Ua faamautu mai e le Peresetene o le Toomaga mo ē Puapuagatia, Siliniu Lina Chang ua iai nisi i Niu Sila ua faaali atu le manaoga e amata se teugatupe e mafai ona tuu atu ia i latou ua tausia nei le fanau e toalua a le tina lea na maliu i le masina na tea nei ma ua tuua‘ia ai lona toalua i lona maliu.
O le faalavelave lea na tulai mai i Leauvaa lea ua tele lava faitioga ua fai i ai i le ofisa o leoleo, ona o lipoti na toe tatala lava i tua e leoleo le toalua o lea tamaitai sa taofia ona o le tagi a lea tina i le sauaina e le tamaloa o ia. O le faalua lea ona taofia o lea alii ona o sauaga ua fai i lona toalua ma o faamatalaga o lea faalavelave e faapea, o le po lava la na toe tatala ai i tua lea alii na faapea ai loa ona masalomia le alu sa‘o lava i lona aiga ma faaoo le oti i lona toalua.
Faaalia e Chang ua faafetaia lava le logo atu o ia e i latou ua faaali atu le manatu e fia fesoasoani i le fanau e toalua a le tina ua maliu. O le fesoasoani na ta‘ua e Chang o le amata ai se tusitupe ma o le numera o le a faalauiloa ma ave ai fesoasoani tau tupe a soo se tasi e fia ofo atu i lenei teuga tupe faapitoa. O le faamoemoe ina ia iai se fesoasoani mo le tausiga o le fanau laiti ua tuua e le tina le mafutaga o sauaga.
O lea lava e lei sau se lipoti mai i Leoleo pe ua taofia pe ua molia foi le tamā o le aiga i lenei faalavelave ae o lea na ta‘ua e leoleo o le lē mafai lava ona taofia o lea tina ona sa tatau lava ona mae‘ae‘a lelei lava mau e mafai ai ona taofia lea tama i tagi ia na fai muamua e le tina lea e ui o lea na oo atu lava le tina ma manu‘a o le susunu ai o lona fatafata i le sikaleti.
E iloa i le vaiaso lenei pe ua toe taofia la le tama ae pe o molia foi i lenei faalavelave. O le tamaitai lenei e lei alu i le Toomaga mo ē Puapuagatia ae na alu sa‘o lava i leoleo ma e faatolu lava ona agai lea tina ae ua mulimuli ane ua maliu.
O le faamatalaga a Chang e foi mai i Samoa i le mae‘a ai ona faamautu o le fesoasoani lenei ma faalauiloa loa foi i Samoa le numera e mafai ona fesoasoani i ai le atunuu mo le tupe e ave i le tausiga o le fanau a lea tina.
