Ua ave se su i le faamasinoga maualuga a le pisinisi o le Barefoot Advertising Limited i Motootua faasaga i ni totino o le Malo le Pulega o Uafu (Samoa Ports Authority) ma le Faalapotopotoga o Vaa a Samoa (Samoa Shipping Corporation).
O le pulega o le uafu i Mulifanua ma Salelologa na tuuina atu e le Malo i le vaaiga ma le pulega a le Faalapotopotoga o Vaa a Samoa i le masina o Iulai o le tausaga ua mavae 2014. O ia uafu sa i lalo muamua o le vaaiga a le Pulega o Uafu.
O le taimi lea na sainia ai e le Pulega o Uafu se maliega ma le pisinisi poo le kamupani o le Barefoot mo le faia o ana faasalalauga faapisinisi uma, peitai ina ua maua e le Faalapotopotoga o Vaa a Samoa le pulega o ia uafu e lua na faapena ona aveesea ai ma tala i lalo e le faalapotopotoga o vaa se laupapa o faasalalauga faapisinisi a le Barefoot sa faatu i le uafu i Mulifanua.
I faamaumauga a le faamasinoga o loo ta‘ua ai o le mafuaaga lea o le faaulu atu o le tagi poo se su a lea pisinisi ua talosagaina ai se taui e totogi atu e le Faalapotopotoga o Vaa a Samoa ona o le talaina i lalo o lana laupapa o faasalalauga faapisinisi e aunoa ma se mafuaaga faaletulafono.
Ua tagi ai foi le pisinisi lava lea faasaga i le Pulega o Uafu ona o le solia o le latou maliega na faia. E lē o faailoaina i faamaumauga a le faamasinoga pe fia se tupe o loo aafia i le su a le Barefoot Adverstising Limited, peitai o le fofogaina o le mataupu i le valaauga muamua i le masina o Fepuari o le tausaga nei 2015 o le tagi na talosaga ai le Faalapotopotoga o Vaa a Samoa e toe tuu atu se avanoa e faaulu atu ai lana tali i le su poo le tagi a le pisinisi.
Na tolopo ai loa i le masina o Mati o le tausaga nei lava, peitai e lei tuuina atu se tali i le tagi ae ua faaulu ai le talosaga a le Faalapotopotoga o Vaa a Samoa ina ia soloia ma aua ne‘i suesueina le mataupu poo le strike out motion.
Ina ua taoto le mataupu i lea tulaga na valaau ai loa i le aso 28 o le masina o Setema 2015 mo le iloiloina o lea talosaga. O taualumaga o le mataupu na taunuu ai le faamasinoga i lana faaiuga e teena le talosaga mo le taofia o le tagi a le pisinisi, ona e iai vaega ‘anoa e tatau ona silasila i ai le faamasinoga mo sana faaiuga mautu i le finauga.
O le soloia o le strike out motion ua faatonuina ai le pisinisi o le Barefoot e toe faia se teuteuga i lana su poo le tagi ina ia manino tonu mafuaaga o lona finauina o se taui mai totino e lua o le Malo o loo tuua‘ia.
