Na faatumulia le malae o le Don Bosco i Alafua, i mātua aemaise o tama tuai o le Aoga, auā le faailogaina o le 25 tausaga talu ona faavaeina lea Aoga i totonu o le atunuu.
O le Aoga a Don Bosco na faavaeina i le tausaga e 1989, auā le suesueina o le poto salalau.
I le saunoaga autu a le Afioga i le Palemia, Susuga Tuilaepa Lupesoliai Dr. Sailele Malielegaoi, na momoli ai le faamalo e le gata o le Afioga i le Pule Aoga, o faiaoga aemaise o tama talavou o loo aoaoina i totonu o le Laumua.
Na saunoa le Afioga i le Palemia i se tasi o matatia na faatuina, o le tatala lea o faitotoa o le Aoga, i le motu tele i Salafai, auā tama talavou o loo toe fia maua le avanoa e toe aoaoina ai, auā se luamanai manuia.
O avanoa faaauro ia e pei ona saunoa Tuilaepa, e toe maua ai le avanoa o tama talavou e aoaoina ai le poto salalau i le faatinoina o soo se matata o loo aoaoina i totonu o le Aoga.
O le malaga mai ai o Misionare i totonu o le atunuu, na saunoa le Afioga i le Palemia lona faatāuaina e le Malo, ona o le latou sao e pei ona tatala ai faitotoa o le Don Bosco, mo tama talavou o loo toe fia aooga.
Na faaalia foi e le Afioga i le Palemia, taumafaiga a le Malo, ina ia maua avanoa tutusa e aoaoina ai alo ma fanau a le atunuu, auā se lumanai manuia.
E pei ona faaalia e le Afioga i le Palemia, e tele nisi o matatia a le aoga e pei ona silafia e le mamalu o le atunuu.
O le tulaga lea i vaega tau i faafiafiaga faaleaganuu, e pei foi ona valaaulia soo e le Malo Don Bosco e faafiafia i soo se fono faavaomalo a Samoa e fai, ona o le mataina o a latou faafiafiaga.
E le gata o aoaoga tau i le poto salalau, ae o loo faapea fou ona maua ai ma le avanoa e faaalia ai le taleni o le siva, e faailoa ai tu ma aga faasamoa, o le faaopoopo lea a le Afioga i le Palemia.
Peitai i se tala otooto o le amataga o le Aoga, na saunoa ai se tasi o faiaoga, e pei o i latou ia na faavaea le aoga o loo i ai, le Susuga Isitolo Stanley.
Na saunoa Isitolo e faapea, i le faavaeina o le Aoga sa iai le manulauti poo le anavatau tauave, o le avanoa lona lua lea e mafai ai ona aoaoina tama talavou i le poto faamatata eseese.
E le gata i lea a o se avanoa foi mo i latou ua lē ausia pe lē fia oo foi i le Iunivesite (NUS).
I le tatala ai o faitotoa o le Don Bosco, na faaulufale ai tama talavou e 60.
E toa 15 tama i le vasega e tasi ma e fā vasega sa iai i lea vaitau, ona e na o le faainisinia ma le faakamuta sa amata ai, a o avea Fr. Hans ma Pule Aoga, lea ua tuumalo.
Na faaalia e Isitolo e faapea, e tele nisi o vaega na naunau i ai Fr. Hans e aofia ai le toe faatele o le faleaoga, o le auina atu lea o faiaoga mo atunuu i fafo auā le toe polesi ina ia siitia le aoaoina o fanau aemaise o le toe faaopoopo lea o nisi faleaoga aemaise o mataupu e aoaoina ai, lea ua taunuu i le taimi nei.
Na mae‘a Fr. Hans ma sosoo ai ma Fr. Mosese lea na ta‘ua e Isitolo e faapea e tele foi le sao o lea tamalii i totonu o le aoga.
“O le mau a Fr. Mosese i le tau faatonutonuina o amioga a tama a le Aoga, e sa le malovale.”
O Fr. Mosese foi o se Pule Aoga pito sili lea ona umi lana tautua i totonu o le Laumua, e pei ona saunoa Isitolo.
Na sosoo ma Fr. Iosefo o Vaitele, Fr. Petelo Vito Pa‘u, Sr. Monika Vaipuna ma faaiu ai ia Fr. Chris Ford lea o loo Pule Aoga i le taimi nei. Na fiafia foi Isitolo e faailoa nisi o taunuuga lelei, e pei ona iai tama talavou na aoaoina i totonu o le laumua.
O tama uma na ulufale i le Laumua mai le tausaga e 1989 – 2013, o le 70% o i latou na maua galuega mautu.
O le 5% ua ofo o latou ola mo le Atua ma lana galuega ae o le isi 20% ua nafa i latou ma le fatuaigatausi, ae o isi e ese le matata sa aoaoina ai, ese le galuega lea o loo galue ai.
Na avea foi lea faamoemoe a le Laumua na momoli mai ai vaimalu i puega ia Samoa, ona o nisi o faaletonu na tulai mai i tausaga ua mavae i tama aoga a Don Bosco.
“Afai o toe iai lava ni sese o tama o le laumua ua tuanai se‘i oo mai i le asō, alofagia, malie afenoa outou finagalo lafo i nuu lē ‘ainā. O outou matou te magalo ai.”
Source
