O le Aso Sa na faaopoopo ai le itula e tasi i le polokalame Samoa ua loa na auauna i le faafofoga a Samoa i Sini le FM98.5 poo le Fofoga Moomia lea na faavae mai le 1993.
Na amata mai lenei auaunaga e na o le tasi le itula faatoa maua ai lea o itula e lua mai le ono i le taeao o Aso Sa seia paia le itula valu i le teao lava.
O le taimi nei lea ua tolu itula mai le ono i le taeao i le itula iva e faatatau i tapenaga a le mamalu o le atunuu i tapuaiga. Mai le amataga sa puleaina lava e le afioga i le faatonu muamua le susuga i le Faifeau Rev Pasefika Maiava ae lei malaga atu mo aoaoga i le Kolisi Faafaifeau i Malua ma le faletua ia Tala.
Sa seei loa le Afioga Mano Semikueva Lynch i le tofi faatonu ae faaauau ai le auaunaga faatasi ma sui faasalalau ia Tupuola Viliamu Eli, Farani Swann faapea Opi Toomalatai. O se auaunaga moomia tele auā e fetaui lelei taimi o loo faasalalau ai i le faalogo a le toatel o tagata Samoa ua malolo mai galuega faapea i latou o sauni i taaloga a le fanau. O nisi foi e maua ai faamatalaga tāua i faleoloa e faatau ai taumafa ma toonai pe a asia aiga ma uo i Aso Sa.
Ae peitai o le autu lava o lenei polokalame na faavae ai o le tapena lea o loto ma agaga o le atunuu a o lei ulufale atu i Malumalu tapuai i le Sapati.
O se polokalame foi e tuliloaina mai aso ua tuanai seia oo mai i lenei vaitaimi i tala fou tuusa‘o mai Samoa i le siufofoga o Samoa le leitio 2AP i Mulinuu.
O nei tala ua masani le atunuu mai tausaga ua tea lea e masani na fesootai ai ma suafa iloga o sui tuai o le 2AP e pei o Vaasiliega Iupati Laga‘aia faapea le afioga Lilomaiava Andrew Faasau. O nisi foi o taimi e fesootai mai ai Luailepou Tia Auvele, Tutuila Farao faapea Rosie Alaalatoa.
E momoli atu foi e le Fofoga moomia i Sini nei tala fou i mea e tutupu i Sini, Ausetalia mai lona nofoaga autu i Burwood.
