Ole saunoaga ale Palemia e faamalamalama le leaga ma le matautia ole ulaula tapaa e lagolago ai le faamalamalamaga ale Minisita ole Soifua Maloloina ile tulafono taufaaofi faasino ile sikaleti, na afea ai ma le mataupu ile fesootaiga televavave ua faaigoaina Ole Palemia poo OLP.
Na mafua ona oo le taitai ole Malo i lea mataupu ona o lona naunau e faailoa ile atunuu mafuaaga e faatino ai e le Malo le sii ole tau o taumafa lololo, le avamalosi ma le tapaa ona ole puipui ile soifua maloloina ole atunuu. O ia siitaga e lē o noatia ai le aumai pea e le Malo o ia taumafa ma oloa tau avamalosi auā ole saolotoga lea ole tagata lava ia e faia ai lana filifiliga ile mea e ola lelei ai ma le mea e vave ai ona uma lona soifua. Na saunoa Tuilaepa e lē pei o gaioiga a isi tagata e pei ole faipule o Olo e lalafi i tua ma isi tagata ma fai faasalalauga e faavevesi ai le atunuu.
“Ole ā foi le mea na toe tuu iai ma lena mea ole saolotoga, ana lē tuu fua iai lena mea ole saolotoga e le agasala Atamu ma Eva. Ana aveese lena mea semanu e faapenei oloo tatou iai lava i lalo nei, tatou te o uma lava ile lagi, leai ni faitioga e lalafi i tua ole OLP pei ole mea lea e fai e le tama lea o Levaopolo. E lē lalafi i tua o na mea ma faaleaga mai le Malo. Ae ole agaga foi lele o outou uma ia e aofia ai ma oe Levaopolo tuu, tuu le amio lena aua ua ou fai atu e leai a se isi outou e lē o iloa. O lea ua iloa uma a, outou nei e faavevesi atunuu. Lea la ua ou ta’u atu na’o oe. O lea ua fautuaina le ofisa ole Loia Sili ma le Komesina o leoleo e molia, molia ile tulafono, ole a vevesi le atunuu ona o tou mea ia tou te faia.”
Na tali Olo ole isi ona suafa matai o Levaopolo ma ia folasia ile Palemene e tuu atu ia ile faamasinoga se’i faasa’o ai le mataupu. “E lē logo mālie le tuua’iga lea ua saunoa iai le Palemia ona oloo faafofoga lo matou itumalo, ole a tatou feiloai ile faamasinoga”. Ose faasalalauga mai le ofisa o faamatalaga ale Malo ile vaiaso ua mavae na faailoa ai e le Palemia ua iloa uma i latou oloo i tua o faasalalauga a OLP ma ua fautuaina le Loia Sili ma le Matagaluega o Leoleo e faia loa ni moliaga. E lē o mafai ona saunoa mai le Loia Sili ma le Komesina o Leoleo poo ai i latou ua molia ae pe toafia.
