Ua tapena nei e le ofisa o le Loia Sili a le Malo i le vaega o feagai ma le finauina o moliaga solitulafono poo le prosecution, se talosaga tusitusia e finauina ai le tatau ona suia o se faamasino e feagai ma moliaga o le Peresetene o Faamasinoga o Fanua ma Suafa le afioga .O le Aso Faraile 9 o Novema 2018 na valaau ai le mataupu i le faamasinoga faaitumalo, ina ua maea ona aumai le faaiuga a le faamasinoga maualuga i le talosaga apili a le itu a leoleo ua faaleaoga ai le faaiuga e faapafala se faasalaga e aunoa ma le faamaonia o le moliaga o le Peresetene.
Ua faatonu ai e le faamasinoga e toe suesue le moliaga o le faaoomanu’a na ioeina e Fepuleai.
O le afioga i le tamaitai faamasino Alalatoa Rosella Papalii na faia le faaiuga o le Peresetene o faamasinoga o fanua ma suafa. O le faamasino foi lea na toe valaau ai le mataupu i le Aso Faraile ua mavae.
Sa iai se feiloaiga muamua a loia a leoleo ma le loia a Fepuleai sa tuu atu ai se manaoga o le loia a le Peresetene ia sui se faamasino ma ua malie ane le tasi o faamasino le afioga Leota Raymond Schuster, e taatia atu ia te ia e faia le faamasinoga pe afai o le a faasee ese le tamaitai faamasino le afioga Alalatoa Rosella. Na faailoa e le tamaitai loia mo le itu a leoleo o Leone Su’a e lagolago i le talosaga a le loia a Fepuleai le afioga Aumua Ming Leung Wai e sui se faamasino.
Peitai na faaalia e le faamasino afai o le tulaga lea o loo manatu iai le itu a leoleo, e ao ona tuuina atu se talosaga tusitusia e tuu atu ai mafuaaga o le tatau ona sui se faamasino, ma ia tuuina atu lea talosaga pe iai ni mafuaaga tatau faaletulafono e agavaa ai ona faia sea suiga i se faamasino.
O le aso 23 o Novema o le a suesueina ai e le faamasinoga lea talosaga ma aumai ai se faaiuga i le suia o se faamasino e toe tagofia le faia o se faasalaga o Fepuleai Attila Ropati.
O loo atugalu le faamasino le afioga Alalatoa Rosella i le saga faaumiumi pea o le faamasinoga o le Peresetene, ma ua tatau ona faatelevave lona faagaioia, ona ua tele masina e lē o toe galue Fepuleai, aemaise o loo faaauau pea ona totogi e le Malo a’o ave ai ona aso malolo faapitoa poo special leave e faatalitali ai se isi faaiuga o lona moliaga.
