O le agasala a le tuafafine ua togisala ai le afioaga o Vailele e faatulai ese ma le nuu le aiga, ma o se itu ogaoga lea i le silasila a le faamasinoga ina ua faia le faasalaga o le tamaitai o Fofoga Tufele 23 tausaga lona matua. Ua amata tuli nei lona faasalaga e 2 tausaga ma masina e ono i le falepuipui i Tafaigata.
O le faasalaga lea a le faamasinoga maualuga ina ua lau le faaiuga o moliaga o Fofoga o le faaoomanu’a tuga i lona tuagane e 17 tausaga le matua. Na ioe le tamaitai i moliaga a leoleo. O Mati o le tausaga nei 2018 i le po o le Aso Toonai na oo ai Fofoga i lo latou fale ma ni ana uo ma faaauau ai le latou fiafia sa inu ai le latou fagu malosi o le vodka. O lona tuagane sa moe ae o le pisapisao o le inuga a Fofoga ma ua vevesi ma se tasi o ana uo sa latou inu, na ala ane ai lona tuagane ma tutuli ese ma le fale ona ua ta ifo lava le 5 o le taeao o le Aso Sa o loo avau lava le latou fiafia.
O le ita o Fofoga i le tutuli o latou na fufusu ai loa ma lona tuagane. Na ia maua se fasi tioata o le faamalama o le latou fale, ma ia tatui ai loa lona tuagane. Na tali ane e lona tuagane i ona lima le alu atu o le sasau o tui ma avea ma pogai o le tafetotoi o lavea o lima o le tuagane.
Na oso ane se tasi o taulealea matua o le aiga e pei ona faaalia e leoleo, ma tulei ese le tamaitai na mafai ai ona alu ese lona tuagane ma le fale peitai na palasi i lalo ina ua oo i fafo ona ua vaivai lona tino i le gaioiga na faia e lona tuafafine ia te ia.
Na faaalia e leoleo i luma o le faamasinoga na laga ane nisi o tagata o aiga tuaoi ma faanatinati i le falemai le tuagane ma taofia ai mo le vaiaso ona o le ogaoga o manu’a i ona lima mai le ma’ai o le fasi tioata o le faamalama o le fale. Na ta’utino Fofoga i le lipoti a le ofisa faanofo vaavaaia ua matuā salamō, ma ua ia iloa foi le leaga o lana gaioiga na fai i lona tuagane. Sa ia ta’utino foi i luma o le faamasinoga o ia o se tagata e malosi le fiafia i le avamalosi, ma o le fautuaga lea a le faamasinoga i le tamaitai ia taumafai e pulea lelei lona tagofia o le avamalosi.
O le matuia tele o le faaoomanu’a na ia faia ua manatu ai le faamasinoga e faia se faasalaga faafalepuipui ia taofia ai le tutupu mai pea o solitulafono e aafia ai le saogalemu o le soifua o tagata.
E 3 tausaga na amata ai le fua a le faamasinoga i se faasalaga o Fofoga ae o le ono masina na toesea ona o le faasalaga a le nuu ua faatulai ese ai lona aiga e mafua mai i le vevesi na tupu ma aafia ai lona tuagane i manu’aga.
Na faailoa e le afioga i le Faamasino le afioga Vui Clarence Nelson i le tamaitai o Fofoga, ua faatāua i le faaiuga le faasalaga a le nuu ona o se vevesi na amata e lē ua molia ae ua palasi ai i tau’au o lona aiga le faasalaga ae leai se isi na auai i le vevesi na ia faatupu. E oo foi i lona tuagane na aafia i lana faaoomanu’a ua lavea ai i le faasalaga.
