O le afeaina ai o le auaunaga a le 2FS-Radio i Sini Ausetalia e le faigamalaga a le susuga i le alii Faifeau Misionare mai Brazil ma si ona atalii ma tauto’aluaina mai ai e le susuga i le Faafeagaiga ia Pastor Lolani Mikalele, ona o le fia asia lea o le leitio o loo avea ma ala o loo latou maua mai ai faasalalauga i le gagana Samoa mai lo latou foi lalolagi, na maua ai le avanoa e faatalatalanoaina ai i le galuega ma le auaunaga o loo galue ai i totonu o Brazil.
Ina ua fesiligia e le tatou nusipepa le alii faifeau misionare, i lana galuega i lea foi atunuu, ma sa ia faamatalaina ai e faapea, O ia sa ofoina atu lona soifua e galue fesoasoani ai i lalo lea o polokalama a le Faalapotopotoga o Tupulaga Talavou Kerisiano a le Lalolagi. I le taimi lea faatoa sefulu ma le iva (19) ona tausaga, ma o loo faaauauina lava e oo mai i le taimi nei.
I se vaega la o lea molimau a le alii misionare, na ia faamatalina ai se tala ofoofogia i lona olaga i le galuega. Fai mai a ia, o lona uluai to’ai taunuu ai i le atunuu o Brazil, na tupu ai se faalavelave matuia ia te ia, ina ua sauāina ai o ia, e alii leoleo o le malo ona na manatu i latou o ia o se tagatānuu o le atunuu, ma faapea foi latou o ia o se tagata o loo aafia i le faatauina o fualaau faasāina (drugs).
Na gaui ona vae ma ona lima i le sasaina o ia e leoleo ma latou tuuina foi le fana i lona gutu ma fai atu ia te ia e uiga i fualaau faasāina. Na ia tepa ane i luga ma faapea ona lagona, ua oo mai lona taimi e oti ai.
O lea na ia amata ai loa ona tatalo i le Atua ina ia laveaiina lona ola i le gagana Samoa. Na avea lea, ma mafuaaga na talitonu ai loa alii leoleo o ia e lē o se tagata Brazil ona e ese le gagana lea o loo ia tatalo ai.
Na avea lea ma laveai mo ia ma ua faasaoina ai lona ola, e ui ina ua toeitiiti oti i ona manu’aga tuga i lona tino.
Na valaauina loa e leoleo le taavale a le falema’i (ambulance) ma faanatinati ai loa o ia i le falema’i. E lua (2) lelei masina o taoto ai i le falema’i i le tuga o ona manu’a, ae faapea foi ona gasolo atu uso ma tuafāfine Kerisiano ma faia talosaga mo ia i lona moega a’o taoto ai. Na ia ta’ua foi le fesiligia ai o ia e uso ma tuafāfine ina ua tau maua sona malosi e tautala ai ma faapea atu ia te ia pe o le a toe foi mai i Niu Sila pe a malosi.
Ae o lana tali, afai o lea ua puapuagatia lona olaga i Brazil ona o le galuega, o lona uiga la, o Brazil lava ua faasino mai e le Atua mo ia e oti ai. O le ala lea o lona galue ai pea i Brazil mai lava i lona olaga talavou e oo mai i lona taimi fai aiga ua silia nei ma le luasefulu ma le valu (28) ai nei o tausaga o nofo ma galue ai i le galuega lavea’i mo tagata matitiva ma puapuagatia o lea atunuu.
O le malaga mai a le susuga i le alii Misionare ma si ona atalii, o se tasi o a latou poloketi (project) mo le galuega fesoasoani ona o le fia fausiaina lea o se pa e siomiaina ai le nofoaga atoa o loo iai lea auaunaga ina ia saogalemu e o galulue ai aemaise foi o le faitau afe ma afe o tagata matitiva o loo sulufa’i atu iai mo se fesoasoani.
Talu ai ona o le malosi o le fasioti tagata ma le faomea i lea atunuu, o le ala lea o le moomia ai o lea galuega mo le saogalemu ai ma le puipuiga o ē uma o iai, ona o loo mafai lava e tagata faomea, o ē faatauina o fualaau faasāina ma le fasioti tagata ona latou osofaia lea nofoaga ona e leai se puipuiga malu o iai.
O lea malaga o loo taamilo nei i Samoa, Amerika Samoa, Niu Sila ma Ausetalia e faatagisia ai le loto kerisiano ma le aao foai mai o tatou tagata ina ia mafai ai ona faataunuuina lea poloketi (project) o le puipuiga.
O le alii Misionare o le susuga lea ia Mati Masinalupe Faoagali ma si ona atalii o Corey Masinalupe Faoagali mai le afioaga o Safaato’a i Lefaga ma o loo ua faaipoipo nei i se tamaitai mai Kanata (Canada) ma ua toatolu (3) si a la fanau.
