Fai ma le malamalama ou faiva, ma mautinoa le Atua i lou loto auā o Ia e taula i ai lau tautua ma afua ai faamanuiaga, e fai lea ma taiala o lau faiga filifiliga e ala i fonotaga a le sinoti e pei ona tauaofia ai le usugafono mai matagaluega e 16, amata mai Hastings seia paia Invercargill i le aso 3-4 Iuni 2011.
O le aulotu malosi i Levin, o loo taitaia e le susuga Kini Ulu Kini ma le faletua Theresa na ofaga potopoto i ai le sinoti atoa ma o le faletolu lenei e aofia ai Pamasetone ma Hastings sa feagai ma le taliina o le fono i aso e lua.
O le taeao segisegi o le Aso Faraile na alo atu i le agatonu, le ‘ava o le feiloaiga e pei ona masani ai fesilafaiga, ina ua taunuu mātua o le sinoti, susuga Savaii Loto ma le faletua Perise faatasi ai ma le mamalu o usufono tofia.
O le fetalaiga Tuisamau, Fata Faleulu Matua (Levin) na lauga fetalai ae tali fuaitau le tofa Taumai Leoo (ChCh). Na tuai atu nisi o usufono ona o le taumamao o auala uia, peitai na papatutu‘i le hall ma o se sinoti na faatumulia i ē na auai.
Na faagasolo polokalame i uluai fonotaga a faifeau ma faletua, mae‘a lea sosoo ma le sinoti a le auso fealofani sa taitaia e le peresetene Perise Loto.
O se fono umi, ai ona o le loloto o le faatofalaiga a tina, ae faafetai i le tapuaiga a nai faifeau ma tamā auā na tatali atu lava se‘i talisua faatasi.
O le 5am taeao o le Aso Toonai na ulufale le sinoti tele a alii, amatalia i le sauniga lotu sa taitaia e le susuga i le sea Savaii Loto.
O lea sauniga sa tuuina aloaia atu ai le pine auro ma le faamanuia i le tamā matua Aufai Ropeti Sega (Taita) ua ausia le 70 tausaga o le soifua a o galue pea i le upu folafola o le talalelei, faatasi ai ma le taliaina o failauga faamaoni fou e toalua ina ua faamanuiaina uma suega, Mana‘o Tovio (Porirua) ma Faaiu Leiataua (Tawa).
Na amatalia loa fonotaga e ala i tauvalaauga o usufono filifilia.
Sa faatasia foi le saofaiga i faifeau mālōlō manumalo faapea faletua mālōlō, misionare Samu Amitunai & Ianeta faapea le au faalogologo e tapuaia faiva.
O le failautusi o le sinoti susuga Kolani Fiti na vaavaalua ma le alii sea i le laulaufono, ma e fai lava sina lololo ma le ‘anoa o mataupu aemaise mau sa soalaupuleina.
E pei ona saunoa le taitai, ia alu ma le mautinoa ae aua lava le masalosalo auā o le ma‘i sosolo lea o loo lavelavea ai le kerisiano.
O le tofa ma le faautaga o le finagalo poto lea ua maua ina ua masino i lelei ma leaga o se mataupu, ua loloto le faautaga auā ua mae‘a ona tofu i le loloto o le faavae o se mataupu, ae aumaia mau ua tasi i ai le sinoti e afifi ma pōpō lelei mo le faalagamaea a le Koneferenisi aoao i Samoa i le masina o Iulai.
O le tala i le malosiaga tau tupe a le sinoti na tauaaoina e le teutupe Ale Palelei, ina ua mae‘a ai le fono o se avanoa na maua sa fetalai Taumai, sui o le faletolu e momoli le faafetai i le sinoti auā le fesoasoani tau seleni mo Kalaiesetete i le mafui‘e.
Sa tali fuaitau tofa Taulealeausumai (Hataitai), o le faleono i Kalaiesetete e aofia ai Addington, Hallswell, Ashburton, Dunedin ma Invercargill e taliina le sinoti i le 2012 pe a aulia.
E maitauina le noonooia ma le gapatia o le matagaluega i Levin, aemaise le faletolu i le taliina fiafia o le sinoti, e ui ina ma‘ati le malulu sa lē faatafa.
Matagofie le gaseseina o le fofoga taumafa i vaitamini eseese, ae silisili ai le lololo o le laufofoga fiafia i taimi uma.
Ia sagai ane ‘ai o le tai i le faatamasoalii a mātua o le sinoti, susuga Savaii ma Perise Loto faapea le usugafono Niu Sila i Saute, ia manuteleina outou faiva i le agalelei mai o le Atua.
