O le tafa a‘e o ata i le taeao segisegi ma le mālūlū o le Aso Toonai na tea nei, na faataunuuina ai le usu alele ma le alii taeao a Tamalii ma Tapaau, o le Paia lava lea auā tama ma Aiga, o aiga foi ma tama, tainane o le usoga ia Tumua ma Pule, Itu‘au ma Alataua, Aiga i le Tai ma le vaa o Fonoti.
Ae ui lava foi ina ua faameleke motu ia e i le itulagi la‘ea ae leaga e faigata o la e iai Paia o Sua ma le Vaifanua, Sa‘ole ma le launiu na saelua, o Itu‘au ma Alataua, o Fofo ma Itulagi, Tama a le Manuatele ma tootoo o le Faleula, o loo alaala i Kuiniselani nei, auā le afio mai o le afioga i le Palemia ma le Masiofo ma le mamalu eseese o le aumalaga i afioga i Minisita sa auai mai e pei ona ta‘ua i la tatou lomiga o le vaiaso ua tuanai.
Na taunuu le faigamalaga na faafeao atu e sui mamalu o le malo o Ausetalia ona feofoofotai lea e faatulima sosoo ma le Sauniga lotu sa taitaia e le toeaina Faatonu Kerita Reupena, o ia o le taitaifono o le Ekalesia Soofaatasi, ona alo lea o Samoa potopoto i le alii taeao, na usu faaaloalo foi le faafaleupoluga a Tumua ma Pule.
O le Fetalaiga i le matua na togi ia Alipia, o le afioga lea i le Minisita o mataupu tau Tina & Tamaitai, Atina‘e o Nuu ma Afioaga ma Agafesootai, le fetalaiga ia Tolofuaivalelei Leiataua Falemoe na fetalai e talifuaitau e tusa ma le aso.
Na fofogaina ‘ava o le usu e le fetalaiga ia Taatiti, o le Minisita lagolago o Leoleo ma Falepuipui, le Afioga Lafaitele Patrick Leiataua Lesā; o le Paia i le Aiga Samoeleoi i le afio o le Tapaau o le Alataua o le Taauso ma lo latou matua, tainane o le Tapaaulefano o le fale‘auga ma le nofoapule ma upu i le Alataua.
O le tootoo o Tuisavailuu poo le fetalaiga a Leulumoega le tofa ia Le‘autuliilagi Malaeoalii Sogialofa Vaa Le‘apai na sailia se ‘ava e patipatia ai le alofa o le Atua pe sa sufia foi ‘ava, o le Sooupu (Public Relation Officer) foi lea o le Leo o Tagata Samoa (Matautu, Gagaifo, Savaia, Tafagamanau & Safaatoa i Lefaga).
Na mae‘a fai le siva loa, na laga faatau Leulumoega e saili se gafa o le fale, le fetalaiga ia Sauafu ma le susuga ia Lufilufi le fetalaiga ia Moefaauo Agaimalo Milo, ona pa‘ū ai lea o le susuga a Tuisamau ina ua tasi le susuga ia Fata Masefau e lauga autū o le aso.
O le tufa‘ava o le Tofa Motuopuaa Le‘aluga (Papa Sataua). O le sui foi o le Leo o Tagata Samoa i Logan.
O le taupou sa palu‘ava o le Afioga Nua poo Falenaoti, o ia o le Alo o le Afioga Sala mai le Leo o Tagata Samoa, e pei ona tasi i ai Samoa e tauave e le Mafutaga a le Leo o Tagata Samoa.
Na alo lana afioga i lana saunoaga mamalu a o faafofoga manino le atunuu, ma faagasolo ai faafiafiaga na saunia e le Matagaluega EFKS i Kuiniselani nei, faaiu i le taumafataga mamafa.
Na sosoo ma faaaloaloga faasamoa ma ta‘igasua agai i le Afioga i le Palemia ma le faigamalaga na saunia e mafutaga Samoa uma i Kuiniselani.
Na mulia‘i faagasolo le asiasiga i le aai o Ipswich ma nisi fonotaga faalemalo a o afea ai e le afioga i le Taitai o si o tatou atunuu ma le aumalaga mamalu le Setete o Kuiniselani nei.
