O le faato‘ā tuanai atu o le aso mālōlō faalemalo a Niu Sila, e faamanatu ai le aso soifua o le Tupu Tamaitai o Peretania Queen Elisapeta i lenei tausaga 2011, e mautinoa o se tausaga o le a lē mafai foi ona faagaloina e nisi o tamafanau a le atunuu, na faamanuiaina ai foi i pine taualoa Order of Medits ua lautogia ma tauia ai ona o galuega tetele ma le tāua sa auauna ma o loo tautua ai mo tagata lautele.
I nisi o lipoti sa maua e le Samoa Times, e faapea e toalua tamalii o Samoa sa iai i totonu o le lisi ma sa tufatufaina i ai pine taualoa e pei ona ta‘ua i le faaiuga o le vaiaso na faato‘ā mavae atu. O le afioga ia Faamatuainu Tino Pereira, ma le faletua ia Vaiola Matofai Harris. O le faletua ia Vai o le Vailoa Bugeting Service i Magele, sa tauia i le pine ona o lana tautua matavela sa fesoasoani ai mo tagata lautele.
E iai nisi sa faamanuiaina ma ua tauaaoina foi i ai pine taualoa e pei ona faatulagaina o le 2011, peitai o tagata Samoa lava ia, ua na o Vai Matofai Harris, ma le afioga ia Faamatuainu Tino Pereira.
Vailoa Pacific Island Bugeting Sevice
O Vai Harris ma lana auaunaga e lē toe tau faailoaina i tagata lautele o Aukilani, aemaise lava i Aukilani i Saute. O le fesoasoani a lea foi tina o le atunuu, ua oo lava i totonu o fale faamasino, ma le ute o le tulafono, ma manumalo ai i le tele o finauga i le va o tagata mautotogi i fale ma ē ona ia fale mautotogi. E lē gata i lea, a o le tulaga ia i latou ua leai se fofo o faafitauli tau seleni ma ua matuā mafatia tele ai.
A o le isi itu e malosi tele ai le finau a lea lava tina, o le taumafai lea e taofia le toe faatau ese, poo le toe faatautu‘i o maota ma laoa o le toatele o tagata ua faafesagai ma le ogaoga o aitalafu ma ua agai ina afaina ai fale motu ma le anoano o isi meatotino. Na oo lava i le ta‘i 20 miliona tala le tau aofai o nisi o fale ma meatotino sa mafai ona toe taofia mai ma faasaoina a tagata lautele, ona o le galuega lē faatuaoia a lea foi auauna finau ma le taumafai.
Ae o se talanoaga ma Vai e lei mamao atu, na ia ta‘ua ai lona fiafia tele e faaauau lana galuega ua valaauina ai, o le isi auala lea e lē solomuli ai i soo se ituaiga faafitauli e sulufai atu ai soo se tasi lava i lona ofisa i Magele. O le poto masani, ma le loto alofa faa-Samoa moni e faavae ai lana galuega, mai lava i le taimi muamua sa tau amata mai ai, pe tusa ma le 20 tausaga talu ai.
E oo mai i le taimi nei e lē o mafai lava ona suia ai vaega o loo fai ma tumutumuga o le tautua.
O le faatulagaina o tupe a aiga ma tagata taitoatasi, o lana matafaioi tutasi lea, peitai o isi vala ma matata eseese o lana galuega autū, e oo ai lava ina finauina mataupu agai i le faamasinoga, pe a oo lava ina faafaigata.
O lana molimau e leai se tali lelei e aunoa ma se tigaina. E lē mafai foi ona malamalama i se mataupu, pe a lē matuā oso i totonu ma vavane i fafo itu uma o le faafitauli. O le isi tulaga matautia e masani foi ona ausia e Vai ma lana auaunaga, o le tuusa‘o lea o mataupu agai i le komisi maualuga a le malo, e feagai tonu ma mataupu e ono finauina. A o ia lava finauga uma e tasi lava le faavae, o le alofa ma le saili fesoasoani ona o le faatupulaia o tagata e sulufai ane. Saunoa Vai e lē o faapito foi le auaunaga mo na o tagata Samoa, peitai o loo faasafua mo soo se tasi lava mai isi atunuu i totonu o Niu Sila. O faamaumauga ia ma galuega tāua ma le aogā, na mafua ai ona valaauina le faletua ia Vai Harris ma le Vaiola Pacific Island Budgeting Service, mo le taui tāua e pei ona faalauiloaina i le faaiuga o le vaiaso.
O le tina ia Vai ua ausia le 70 tausaga o lona soifua, ma o ia na fanau ma soifua a‘e lava i totonu o le atunuu i Samoa, a o lei malaga i Niu Sila i le tausaga e 1961. O se tasi foi lenei o tina sa avea ma malo faaaloalogia a le itulau o le Saili Malo a le Samoa Times, i ana tusitusiga masani o le vaiaso e lei mamao atu i le tausaga nei lava.
O le ofisa autū o le faletua ia Vai ma le Vaiola Pacific Island Budgeting Service, o loo i le nofoaga o le ekalesia Papatiso palagi i Bader Drive i Magele. O loo iai le aufaigaluega Samoa, Tonga, Rarotonga, Maori ma papalagi, o loo mafai ona faatinoina le galuega fesoasoani.
Faamatuainu Tino Pereira
E lei manuia le taumafai atu ina ia maua se fesootaiga ma le afioga ia Faamatuainu i le faaiuga o le vaiaso ma lē maua ai le faamatalaga e uiga i le mataupu ua faamanuiaina ai.
Peitai i nisi o tusitusiga i luga o upega o fesootaiga, o loo ta‘ua ai, le telē o le sao o lenei tamalii o le atunuu, le afioga ia Faamatuainu, i le amataina ma faatulaga tulaga o faasalalauga a le Pasefika i luga o alaleo faasalalau i Niu Sila, ma ua silia ma le 20 tausaga o galue pea lenei tamalii i le tele o atina‘e eseese auā lava le unaia atili o sao o tagata Pasefika i totonu o Niu Sila.
O ana galuega finafinau nei a Faamatuainu auā se lelei o tagata Pasefika, ua atili ai ona faatamaoaiga o ia i le tele o tomai aogā, ma ua tele ai foi ina taulamua o ia i mataupu tau le Pasefika i fuafuaga ma polokalame a le malo, lea foi ua faitaulia ai o ia i nei faailoga taualoa o loo filifilia patino ai i latou e tatau ona faaeaina ai.
O le afioga ia Faamatuainu Tino Pereira, ua leva ona auauna ma tautua i totonu o nisi o Matagaluega a le malo o Niu Sila, e pei o le Matagluega o Tagata Atumotu o le Pasefika.
A o lei malaga ese foi ma Samoa, sa lauiloa ma silafia e le toatele lana galuega sa galue ai i le Matagaluega o Faasalalauga ma le Leitio a le atunuu le 2AP. O lea foi le malosiaga ma agavaa sa mafua ai ona tofia ma faauluulu i ai nisi o galuega faapea ina ua taunuu i Niu Sila. Na oo lava ina avea ma taitaifono o le fono faatonu e pulea le leitio a le Pasefika, le Niu FM mo le tele o tausaga. E lei faigofie foi lona finauina o lea foi alaleo mo le manuia tagata Pasefika i le tulaga o faasalalauga.
O ia foi o se tasi sa matuā lagolago malosi ma unai lea mataupu agai i le faigamalo a le Leipa mo le taimi muamua. Na talia e le faigamalo a le Leipa le fanoga, ma e oo mai i le taimi nei, o loo faaauau pea, a o iai i lalo o le taitaiga a le taitaifono Faamatuainu ma le fono faatonu.
O le faaiuga o le tausaga na tea nei, na faato‘ā faamavae ese ai lea tamalii o le atunuu, mai lona tofiga o le taitaifono ma le pulega o leitio a le Pasefika.
O lana mau ona talu ai ua lima tausaga sosoo o loo seei pea i lea nofoa, ma ua iai lona talitonuga ua oo mai taimi o suiga.
O lona faasee ese, o le a avea ma auala e toe tulai mai ai se isi foi e agavaa, ma nisi tomai fou e saga tapue atili ai le galuega, a o le sili ia aua ne‘i motusia ma toe aveesea le lagolago a le malo e ala i tupe o loo faamatuu ane mo le Niu FM, ma le Radio 531 PI.
O lona sogasogā ma le galue malosi mo galuega lelei ma le tāua mo le tautuaina o tagata lautele, o se faamaufaailoga ma le faamaoniga lea o le tuuina aloaia i ai o le Pine Taualoa a le Tupu Tamaitai o Peretania mo le 2011.
