Ua faamaonia mai e le alii komesina o leoleo Fuiavailili Egon Keil le maliu ai o se alii Saina, ma le isi toatasi o loo taufaaola i le falema’i, atoa ai ma le isi toalua o loo tau togafitia manu’aga mai se agaese, mai se osofaiga i le po anapo o se pisinisi i Vaitele.
O le alii Saina ua maliu na tatui i se naifi (tulou). O loo tau sailia e leoleo i latou na faia, ae e faapea le tala, o se osofaiga i se pisinisi ma ua faamaonia le toesea mai o se tupe e lē o iloa i le taimi nei lona aofaiga mai le pisinisi na osofaia.
O i latou ua aafia o ni alii, ma sa faapea ona mauaina e leoleo i le nofoaga na tupu ai le faalavelave se sapelu, atoa ai ma se tamai naifi e lilofia uma i le palapala (toto).
Na faailoa e le alii komesina pe o se taimi o le ‘afa o le sefulu i le po na tupu ai lenei faalavelave.
E lē o se taimi muamua lenei ua tupu mai ai se faafitauli faapea i totonu o Vaitele, ma sa iai foi nisi faalavelave faapea na tutupu muamua mai e aafia ai pisinisi a Saina. E lē o mafai ona faailoa mai le suafa o le pisinisi ua aafia i le taimi nei, ona o le manatu ia i latou o loo aafia i lenei mataupu.
O le talosaga a leoleo o loo tuuina atu i le atunuu atoa ina ia fesoasoani atu i le sailiga o i latou nei, e ala lea i le tuuina atu o ni faamatalaga i se nofoaga e ono maua i ai i latou nei, poo nisi foi faamatalaga e fesootai i le faalavelave ua tulai mai.
O le pisinisi foi o le One on One a Saina i Vailoa na tupu ai foi le tulaga faapea, ina ua osofai e nisi ma gaoia ai le $60,000 tinoitupe, e lei mamao atu foi. Saunoa le alii komesina sa ave foi le fautuaga i le aufaipisinisi a Saina ina ia teu tupe i le Bank poo se sefe malosi ina ia mautinoa e lē tutupu ni faalavelave faapea i le lama o i latou e fuafua e gaoi.
O se tulaga o lea ua agai ai foi manatu o le atunuu i luga o upega tafailagi ona o lea ua oo atu lenei foi faafitauli ina ma’umau ai le soifua o nisi o tagatānuu mai nisi atunuu o loo nonofo ai i Samoa nei. Na ta’ua e le alii komesina o loo faaauau le sailiga a leoleo i le taimi nei seiloga e maua i latou ua soli le tulafono.
Na molimauina le taunuu atu o le Amepasa o le Malo o Saina i Samoa, HE Mr. Chao Xiaoliang faatasi ai ma le toatele o tagatānuu mai Saina i le maota gasegase i Motootua e lagolago ai i tagata mai Saina na aafia i lenei faalavelave.
O le afioaga o Vaitele o se tasi lenei o nofoaga o loo faamauina le toatele ai o tagata faipisinisi mai Saina o loo iai a latou faleoloa, ma o le tasi foi lenei o nofoaga o le atunuu o loo maualuga i le lisi o le solitulafono lenei o le gaoi ma le talepe fale.
E pei ona silafia o Vaitele le isi nofoaga i Apia o loo nonofo ai tagata mai itu eseese o Samoa i fanua faatau a le Malo.
E lē o mautinoa i le taimi lenei se aso e faia ai toe sauniga o lea alii Saina ona o loo faagasolo i ai suesuega a le Matagaluega o leoleo, e lē o mafai foi ona faailoa mai e le Komesina o Leoleo nisi faamatalaga e faatatau i le igoa o le pisinisi a nei tagata Saina na osofaia ai i le Aso Toonai na tea nei. Ae na faamaonia mai e le Komesina o leoleo le toesea ai o se tupe mai i lea osofaiga.
