O upu ia ma loimata le matu o le tamaitai CEO o le SSAB LTD ia Tofilau Fiti Leung Wai, ina ua ia talatala, e aunoa ma se tau tomanatu i le la mafutaga ma le uo e pele i lona loto le tamaitai CEO o le UTOS ia Sa’u Justina Sa’u, na avea lona soifua i le aso 21 o Oketopa o le tausaga ua mavae, lea o loo agai i ai suesuega a le faamasinoga i le taimi nei i lona mafuaaga.

  Na sāō le Potu Faamasino Numera 2 i le itu o le Faamasinoga Maualuga i Mulinuu ina ua faafofoga le faamasinoga i mafatiaga o le uo, sa mamae, sa pele, sa fai tonu faatasi, ma sa’a faaoti le utu a le faimea i mafaufauga, o miti, o tonu o le lumanai aemaise galuega sa galulue ai. Na toe fafagu i luga e Tofilau Fiti Leung Wai taga o le loto mafatia ina ua ia tolaulauina uiga o lana uo CEO lē ua maliu ia Justina.

Na faailoa e Fiti o le galuega na la masani ai ma Justina i le tausaga 1998 a’o galulue ai i le ofisa o tupe a le malo. 

E iai mea e tutusa lelei ai lona tagata ma Justina, o le positive, workaholic kind of people. Na te faamatalaina Justina o se tagata e lē fiafia e fai ni tala o nisi, ae fiafia e fai mea e atina’e ai o ia, tele ana fuafuaga mo le lumanai, e fiafia e talanoa i aitia o pisinisi. “Justina was a positive person. O lana aim i le lumanai, she wants to be a parliamentarian, she wants to run from Aiga i le Tai.”…Tofilau Fiti Leung Wai.

O lana masani e vili atu e taofi ni trophies mo le aoga a Manono mo lana foai i faaiuga o tausaga. E toafā i latou i le faigauoga lea, ma o la latou fuafuaga e fia o i Fiti e tafafao ai ma ave lana fanau e faatafafo, o ia fuafuaga uma sa faagasolo lava e Justina ma o ia sa tilotilo i faletalimalo e nonofo ai ma le faamoemoe e faataunuu ia Iulai o le tausaga nei lea tafaoga.

“O le isi ana fuafuaga o le toe foi e fesoasoani i le pisinisi a lona aiga ma si ona tina.”

Le tamaitai o Justina ma lana uo o Fiti

Na faailoa e Tofilau, o Justina o se tagata faamanuiaina, atamai, tele ana fuafuaga faataatitia, ma e oo lava i ana miti e faailoa atu ia te ia ma o la talanoa ai. “She is full of life person.”

Na ta’ua e Tofilau o le vaiaso a’o lei maliu Justina, sa faamanatu ai lona aso fanau, e atoa i ai lona 43 tausaga, sa o latou vaaia le fiafia o lea tagata, poo ā ni faafitauli e lē vaaia se faanoanoa ae na te taumafai i se auala e foia ai. O le isi tulaga na te iloa i lē ua maliu o se tina e alofa i lana fanau, e tai pei o tina uma lava ma na te iloaina e lē mafai ona faia e Justina se mea faapea i lana fanau. 

O lana vaai e alu lava e faigaluega ma ave lana fanau o se tagata malosi tele. E alu atu lava ma sii atu Julani ma Sofia poo fea lava matou te o i ai… “So as a mother unless e leaga lou ulu o le a e tago ai fasioti oe.”

Na faailoa e le pule o le SSAB, sa talanoa foi ia Justina e faatatau ia Kolani… “O la’u vaai ia Justina ua alofa i le tama lea.” 

O le faamatalaga a Tofilau o ia na uosili i le la faaipoipoga ma Kolani. Na mae’a ae vili atu ia te ia e lē fia nofo Kolani i Ululoloa ona o loo tanu ai lona toalua muamua. Na ta’ua foi e Tofilau Fiti Leung Wai, o Justina o se tagata e lē manao e talatala ni tala lē lelei poo ni mea faapena e faatatau i se isi tagata.

Sa tapena loa i Sinamoga ma sa ia iloa na faatotoga uma e Justina le fale o Kolani ina ua nonofo ai i Sinamoga. O le SSAB sa faatau mai ai meaafale e pei o nofoa ma laulau, pusaaisa ma faakapoti uma le umukuka ma isi meafale, atoa ai ma le masini tamea. Na ia manatua e lei leva lava ona aumai le masini tamea ae vili atu ia te ia pe mafai ona omai tama e avatu le masini, ua ta’e le tapuni. O se taimi muamua lea ua avatu ai se masini ua ta’e faapea i le SSAB.

Na faailoa e Tofilau ina ua vaai ia Justina i le masini, sa ia fesili i ai pe na faafefea ona ta’e lana masini ua matuā leaga lava le tapuni, ae na tali mai, “na ma misa foi tago tu’i le tapuni o le masini” na pau lava lena o lana tala. O lona manatu e taumafai lava Justina e puipui Kolani. Sa iai ona masaloga ia Kolani pei e iai ni ona uiga faapea, e tago fasi Justina ma faaleaga la meaafale, ae e lei talanoa atu lava Justina pe manao foi e faamatala ni tulaga o faia e Kolani ia te ia.

O le taimi mulimuli na ta’ua e Tofilau na la talanoa ai ma Justina o le Aso Toonai ae vaveao o le Aso Sa na maliu ai, na fai le la tonu e feiloai i le ofisa i le Aso Toonai lea, peitai, ona o lona pisi tele i lana fono na ia manatua Justina ua ta le tasi i lea aoauli ma ia lafoina atu loa i ai le feau tusitusia (txt message) faapea ona ua pisi tele ae se’i fai se taimi la te toe meet ai…. ae tali atu i se isi foi feau tusitusia poo le 7 i le afiafi lava lea, ma faapea atu “Hi… malo lava faamalosi, aua e te popole, have a great evening, catch up next week.”

Na faaalia e Tofilau, “E lipi i lona mafaufau o le a alu vave Justina, ana faapea ou te iloaina o le aso mulimuli lea o Justina, I will forget all my work and spend the whole last day with her.” E iloa i lana message e fetaui i le vaiaso e sosoo ai, i lona talitonuga e leai se tagata e faia se mea faapea, o se tagata malamalama. O le pisi ae na iai lava i lona mafaufau la te fetaui i le vaiaso e sosoo ai.

O Justina e to’a, e lelei lona mafaufau e lē o se tagata e vaivai. Na faailoa e Tofilau, e faate’ia ia ina ua ala mai i le taeao o le Aso Sa, 21 Oketopa 2018, e lua feau tusitusia i lana telefoni, o le feau tusitusia i le 3:34am ma le faaupuga “Fiti, Tina is gone” ma le isi feau tusitusia i le 7:10am “Fiti Tina Pass away last night”, faailoa e Tofilau o feau nei e lei talitonu i ai, ma na manatu e pei o sana miti leaga. 

O lea lava taimi na tago ai loa vili le telefoni ma lona manatu pe tali mai lana uo, ma faapea mai o se joke lea mea, ona e lei talitonu lava i se mea faapea e tupu ia Justina.

E mae’a lava le molimau ma loimata o le tamaitai pule o le SSAB o lana tala lava lea, e lē talitonu e oo se mea faapea ia Justina. “She is a happy person.” Na ia ta’ua foi e atoa le fia vaiaso, o mafatia e lē mātū ona loimata, sa taumafai lona toalua e fesoasoani atu, ina ia mafai ona ia faagalo le mea ua tupu i lana uo. E lē mafai ona ia talia le mea ua tupu i lana uo e ese le matuitui tiga.

Sa fesiligia e le loia a lē o loo molia ia Komisi Koria Tofilau, ia Fiti Leung Wai, e iai mea e lē o faasoa atu ai Justina ia te ia, e pei o ana financial situations i le aiga, ae sa tali i ai Tofilau e leai. 

Sa toe fesili foi pe na te iloa e ma Justina e faasoa atu e uiga ia Kolani? Sa tali Tofilau, e faasoa atu na te iloa e iai faafitauli i le la va ae o Justina o se tagata positive e saili auala e foia ai faafitauli e lē o se tagata e vaai atu ua faavaivai ma ua siilima i ni faafitauli.