O le mitamita ma le loimata maligi na lagona e le toatele e ta’u o tagatānuu Samoa ona o le faaeaea uigaese na iai tapenaga na faatinoa e fanau aoga e faafeiloai ai ma tatala aloaia ai taaloga o le Pasefika, o le vaaiga aotelega lea na molimauina i le po o le Aso Sa.
O le aso na tuu fesilisili pe oo ona faataunuu le sauniga aloaia ona o le tetele o timuga i le Aso Sa. Ua vaaia foi le lolovaia o nofoaga tumaulalo o le taulaga e aofia ai ma le malae o le Apia Park. Peitai, o se mitamitaga, ona e oo ane i le taimi ua atofaina mo le faamoemoe, ae uma timuga ma ua laofie, leai ma se mauluulu na toe vaaia. E ui o le palapalā ma le tele o le vaivai ma ua lopala uma ai vaega o le malae i le Apia Park, peitai e lei aveesea ai le sipili ma foliga fiafia o le atunuu, faaopoopo i ai ma le leai o se timu, ua atoa lelei lagona fiafia o tagata uma.
E oo ane i le taimi na ulufale mai ai le autaalo muamua o le savali ua leai ma se uaga e toe toulu. Ma o le taimi foi lea na faalogo ai le alaga fiafia o tagata, patipati ma talotalo atu i le autaalo ma latou fu’a. O le taimi muamua foi lea ua matauina ai le suiga auā e masani ai, seiloga ua maea uma savali ma faafiafiaga aloaia ona savavali mai lea o atunuu ma latou au taalo ma faamae’a ai lava le polokalame.
Peitai o le tausaga lenei, ua faamuamua ona aumai i totonu le au savavali ona agai lea i le nofoaga i autafa o le malae e faamaopoopo uma ai, faatoa faagasolo ai le polokalame aloaia. O se vaaiga matagofie le vaaiga lea, ao alo atu le atunuu i lana polokalame autu.
E mataina ma manaia le felanulanuai o tapenaga a nai fanau ma e momoli ai foi le faafetai i le galuega fita na feagai ma faiaoga, ma pule aoga. E lei iai se iota o faafiafiaga a le fanau e iloa ai o iai se mea o misi i lona faatinoga.
O le o ese mai o tamaiti aoga a le Ekalesia EFKS e pei ona taofi i se faatonuga mai i le Komiti a Aoga a le Ekalesia e lei iai se aafiaga e pei ona faamaonia mai e se tasi o Faatonu o le faafiafiaga, le alii Saina o Wang Tang Jie. O Wang na galulue faatasi ma le alii o Asiata Melvin Solomona i le tau tuufaatasiga o le faamoemoe. O le faamatalaga a Wang, e leai ma se aafiaga o tapenaga a tamaiti aoga, ma o le taimi lava na taofi ai tamaiti aoga a le lotu o le taimi foi lena na aumai ai i totonu isi tamaiti aoga. Tamaiti aoga mai i le Kolisi o Samoa ma tamaiti aoga mai i le Kolisi o Sagata Malia, na faaalia e Wang le vave o le pue e tamaiti aoga o taga ma le faatinoga. Pau lava le faigata e pei ona taua e Wang o le taumfaiga lea o le tuufaatasiga o le fanau aoga. Saunoa Wang o tamaiti aoga uma mai Samoa, e lē faigofie, peitai na faigofie mea uma ona o le galulue faatasi.
O Wang e lē o totogia lona taimi; a uma tapenaga o le tatalaga aloaia o le faamoemoe, ona agai ane lea e fesoasoani i nisi galuega e fetaui mo ia. O le faamatalaga a Wang, e fiafia ua fai lea ma ona sao i le taligamalo a Samoa mo taaloga o le Pasefika i Saute. O se po o le a manatua pea.
