Junior Levi i le taaloga ma le Silver Ferns

E lua ta’aloga na fetaui ai le Silver Ferns le ‘au Neti Polo a tamtaitai a Niu Sila ma le ‘au fili a Tama, NZ Men, e fa’alua foi ona faiaina le Silver Ferns i taaloga ia. O le taaloga muamua na faiaina ai le Silver Ferns 50-54, ae toe faiaina i le taaloga lona lua 54-66. 

Ae tutotonu i manumalo ia le alii Samoa o Junior Levi. O ia lea e taalo i le tulaga o le Goal Shoot, na fiu ai le ‘au puipui a le Silver Ferns e taofia Levi i le taaloga muamua e lei mafai. 

O le umi ma le maualuga o Levi o le fili maoa’e lea na fagai ma le Sivler Ferns. E 2.14m le maualuga o Levi, fa’atusa lea i le 190cm le maualuga o le tamaitai pito i maualuga o le Silver Ferns.  E fa ‘au na tauva i le Tafa-fa i le Cadbury Series e aofia ai ma le ‘au a Fiti. I ta’aloga e tolu a le NZ Men na mata’ina lava le taalo a a Levi. A fa’atusa i le tamaitai ta’uta’ua o le Silver Ferns Maria Folau ile taaloga lona lua, e na o le tasi lava le togi e a Levi e lei sao mai togi e 58. O lona uiga na sao le 57 ae misi le tasi. Fa’atusa ia Folau na togi le 43 ae sao le 40. E 98% togi sao o Levi fa’atusa i le 93% a Folau.  E sili lea nai lo le taaloga muamua, e 51 na togi e Levi ae sao le 46. O Levi lava le tagata faamoemoeina o le ‘au a le NZ Men, o le isi e to’alua ma Levi o Daniel Jefferies e na’o le 12 ana togi i le taaloga muamua (sao le 10) ma le taaloga lona lua e na o le 8 togi a Jefferies (sao uma le 8).  Na manumalo uma NZ Men i taaloga e fa, lua na manumalo ai i le Silver Ferns ma le tasi na manumalo ai ile taaloga ma le All Stars.  Ao isi taaloga e faalua foi ona manumalo le Silver Ferns vs Fiji (manumalo 88-30) ma All Stars (61-45). O iina na maua ai le avanoa a le Silver Ferns e su’e siamupini ai ma le ‘au a Junior Levi, po’o le NZ Men. 

Ua fainaina ai le Silver Ferns ile NZ Men a’o loma le Netball World Championships e fai i Egelani i le masina o Setema. E ui ua faiaina le ‘au ae ua fa’afetaia e le kapeteni Casey Kopua le fefeu o taaloga ia, aua ua tapenaina ai le ‘au mo taaloga ma Ausetalia ma Egelani i le World Championships.  

E to’a tolu isi tamaitai Samoa o lo’o i le ‘au a le Silver Ferns mo le World Cup i Egelani, e iai Maria Folau, Elisapeta Toeava ma Ameleriane Ikenasio. O le Netball World Cup e amata i le masina o Iulai i Liverpool ae faaiu taaloga a le Silver Ferns i le Constellation Cup i le masina o Oketopa. O taaloga ia ma le ‘au Fili a Austalia ua faaigoa o le Diamonds. 

O Junior Levi na ta’alo pasiketi polo faapea foi le volipolo muamua ae ua tosina lona fiafia e taalo Neti Polo. Na ta’ua e le alii taalo, e sili atu ai le Neti Polo nai le lakapi ma isi taaloga aua e tofu lava le tagata ia ma lana tiute tau’ave i totonu o le malae i le Netipolo. E le faia fua e le isi le galuega a le isi i le Neti Polo e le pei o isi taaloga e le manino le laina e va ai tiute a tagata ta’alo e pei o le lakapi. 

O Levi o ia lea na avea ma ese’esega i taaloga e lua ma le Silver Ferns. O lona umi ma le sa’o o lana togi e mata’utia. E le o le taimi muamua foi lea ua taalo ai Levi, na avea o ia ma kapeteni a le ‘au a Alii i Ausetalia a’o nofo i Pirisipeni. O lea ua toe foi mai i Niu Sila ma lagona ai lona fiafia tele e taalo mo le ‘au a le NZ Men.