E tiga ona tumu mai lipoti a le BBC ma le Televise a Niu Sila faatatau i tulaga faaletonu ma le lē saogalemu o iai nofoaga e faamautu i ai au taaalo, e lei toe suia lava le mafaufau o le Pulega o Taaloga o le Olimipeka ma taaloga a Samoa e o lava le au taaalo a le atunuu.
E iva taaloga o loo tausinio ai au ma tagata taaalo taitoatasi mai Samoa, ma e toatele foi ua taumatemate pe lē faamata o le tausinioga lenei o le a vaaia ai e Samoa se laasaga ese e ala i le foi mai o le au ma se pine auro.
Faaalia e le Alii Palemia i le sauniga puupuu e faamavae atu ai i tama ma teine taaalo faapea tagata o loo vaaia tamaiti, o le taumafaiga lava lenei ina ia atia‘e le tomai i taaloga aemaise lava mo le tele o le tupulaga o le atunuu ua agai ina latou lagolagoina ia kalapu o taaloga i le atunuu.
O le fautuaga tele lava a le Alii Palemia, e mo pulega o au ia e ave i fafo atoa ai i latou o loo faauluulu i ai kalapu eseese ina ia tautuana ma i latou teine ma tama taaalo.
“O le feedback lea na aumai e le toatele o tama ma teine taaalo na masii atu nei i fafo i Mini-Games a le Pasefika ma taaloga o le Olimipeka – ua fai mai e tele ina tia‘i lava i latou i le taimi ua ae tafafao solo i latou na tofia e le atunuu e puipuia teineiti nei.
“E tatau ona maua ni a tatou pine auro mai i au taaalo ia ua fai ma sui o Samoa i nei taaloga,” o se faamatalaga lea a le Alii Palemia.
E aofia ai i au taaalo ua masii atu le faipelega, piiga, lakapi taitoafitu, netball, faataavale polo, fanafanaga ma le aau.
O se tasi o fale ua faaali mai i tala mai i atunuu mamao, ua palasi mai i lalo nisi o itu o le taualuga.
O ata nei ua atili ai le faaluafesasi o le toatele e lē mafai e Initia ona latou talimalo i nei taaloga tetele.
Ae o le au a Samoa, ua mae‘a ona saunoa Niko Palamo i fesootaiga ma i latou o loo faatautaia nei taaloga ma ua ia molimauina ai e saogalemu lava le nofoaga o le a agai ma faamautu atu i ai au taaalo.
O le tamaitai o Ele Opeloge lea ua iai faamoemoega o le a ia tulai mai ma se pine auro a Samoa i le vaega o tamaitai i le siisii.
O le au taitoafitu o le lakapi foi lea ua ta‘ua le iai o le manaoga o le atunuu e malo ai i se pine auro Samoa e ala i atina‘e tau taaloga o lenei tausaga.
O le au lava a Samoa lea ua masii atu i taaloga a Malo o le Taupulega e to‘a 72.
O le fono a le Kapeneta i le vaiaso na tea nei lea ua faamautu ai loa le masii pea o le au taaalo a Samoa mo Initia auā le tausinio ai i taaloga e pei ona ta‘ua.
