O le kamupani lauiloa o le Mizuno ua ofo mai nei na te saunia seevae ma totini faapea isi vaega manaomia mo le au lakapi a le Manu Samoa a o sauniuni atu i le taamilosaga o le Ipu a le Lalolagi i Niu Sila faapea ma taaloga faitaulia faavaomalo a o lumanai le Ipu a le Lalolagi ia Oketopa o le tausaga fou.
O le a laeiina foi e le au lakapi tele a Samoa le igoa o le Mizuno e avea o se faalauiloa lelei mo le igoa o lea kamupani ona o se feagaiga ma se maliega ua mae‘a sainia ma le pulega o le iuni lakapi aoao a Samoa.
Faaalia e le Ofisa Sili o le Iuni lakapi a le atunuu, le susuga Su‘a Peter Schuster lona agaga fiafia ma faagaeetia, ona o se faigapaaga fou ua faavaeina ma le Mizuno, ma o se fesoasoani tele lea i tapenaga a le iuni faatina mo le masii atu o le Manu Samoa i taaloga faavaomalo o loo lumanai nei faapea le Ipu a le Lalolagi.
O le alii pule o lea kamupani i Niu Sila ma Samoa o James O’Rourke na sainia le maliega o le feagaiga ma le Ofisa Sili o le Iuni lakapi aoao lo tatou atunuu.
O le Mizuno o se kamupani na faavaeina i le tausaga e 1906 ma ua lauiloa i ana oloa anagata aemaise o ana faiga faapisinisi i le itu tau malosiaga faatekonolosi, ae silisili ona amanaia le kamupani ona o le 6 tausaga talu ai sa galulue ai ma le Iuni lakapi a Samoa i le saunia o seevae mo le Manu Samoa ae o lea ua toe tuu mai foi lona tau‘au e faamāmā i le avega a le Iuni lakapi a le atunuu.
E 11 foi tausaga o ia lagolagoina le Olopeleki a Niu Sila i le saunia foi o seevae ma e faapea foi lana lagolago i le au lakapi a Ausetalia o le Wallabies i le 4 tausaga ua tuanai.
O le Mizuno o se kamupani i totonu o Iapani ma ua loa tausaga o ia gaosia oloa mo taaloga, ma o le sini lea o ana galuega faapisinisi i soo se atunuu o le lalolagi. Ua lagona le fiafia o le pulega a le Manu Samoa, i le aumai o se laveai a lea kamupani, a o tau sailiili tupe le Iuni lakapi a Samoa faapea le Malo mo tapenaga o le Ipu a le lalolagi.
O le sauni ai foi o le au lakapi tele a le atunuu i lea faamoemoe, e lē o tuumāmāina i le tapuaiga a le atunuu aemaise o soo se tagata Samoa o aumau ma alaala i atunuu e mamao.
