Ina ua faalogo le faalapotopotoga a le SSIG i Niu Sila i le amataga o Ianuari e auai mai le afioga i le Palemia o Samoa le susuga ia Tuilaepa Lupesoliai Sailele Malielegaoi i le faamanatuina o le Waitangi Day i Niu Sila i lenei tausaga ona talatalanoa lea o le faalapotopotoga ma faataoto ai le fuafuaga a le SSIG e auai i le faamanatuina o le Waitangi Day a’o faatasi ai ma le Palemia o Samoa

O le faamoemoe maualuga lava o le SSIG o le pueina lea o le Media tele a Niu Sila o le a faasalalauina ai lenei polokalame ma o se avanoa lelei foi lea mo latou e faalauiloa ma faasalalauina atu ai le manaoga o loo iai le SSIG.

O le taunuu atu la o le SSIG i le nofoaga sa faatinoina ai le faamoemoe o le Waitangi, sa talia lelei e Maoli auā sa uma na fai feutagaina ma faamalamalama foi iai le uiga o le auai atu o le SSIG i lea faamoemoe, auā e iai le talitonuga o le SSIG e tutusa lelei manaoga o loo iai tagata Maoli ma isi tagata Samoa le SSIG.

O le lima i le vaveao na fai ai le sauniga lotu muamua ma o le sauniga lea sa iai le Palemia o Samoa, ona sosoo loa lea ma le latou fonotaga. O le 10 i le taeao o le isi sauniga lotu e faapitoa lea mo le solo tetee a Maoli na maua ai le manatu  o le SSIG e talafeauga lelei le sauniga lea mo latou auā e tatau ona faaali ai foi i le taimi lea le mafuaaga o le auai i lea faamoemoe. E lei popole tele le faalapotopotoga a le SSIG pe iai le Palemia o Samoa i lea taimi pe leai, auā pau le vaega e sili ona tāua ia i latou o lea ua mafai ona latou maua atu le media tele a Niu Sila e mafai ona faalauiloa i le lalolagi atoa le manaoga o le SSIG ma le faamoemoe o tagata Maoli.

I le taimi o le sauniga na faafeiloai aloaia ai e le fofoga o le polokalame le auai atu o le SSIG, ma faailoa aloaia le auga o aute o le auai atu.  O le tofa ia Asiata Pouniu na fai ma fofoga o le faalapotopotoga e faaleo lo latou agaga faafetai ia Maoli e tusa ai ma le avanoa aemaise ai o le faamoemoe maualuga na auai ai. Na pue e le media a Niu Sila le saunoaga a Asiata Pouniu faatasi ai ma latou fu’a sa tusia ai ni igoa e faailoa ai lo latou agaga tetee i fanua faaleaganuu o Samoa.

Ina ua ta’ape le faatasiga ae na maua loa avanoa a TV taitasi a Niu Sila e faatalatalanoa ai sui taitasi a le SSIG e uiga i le latou polokalame, ae o se avanoa lelei foi na maua e le afioga i le Minisita ia Shane Jones e pue ai o latou ata ma le SSIG ma faailoa ai e le afioga i le Peresetene o le SSIG i Niu Sila ia Manufui Nielsen Petersen le aano moni o le solo tetee o loo faia nei. Na muamua faailoa le solo tetee a le SSIG i le nofoaga na saini ai le feagaiga lea o le Treaty of Waitangi ona sosoo loa lea ma Maoli.

O le lauga a Asiata Pouniu na iloa ai le lologo o le faalogo o tagata palalagi ma Maoli e fia iloa atili le uiga o le faamoemoe a le SSIG auā na talanoa Asiata i le gagana peretania.

E telē se aogā o le savali a le SSIG, ua lē gata i le maua uma e le media a Niu Sila o le latou polokalame, ae na faailoa le latou solo tetee, auai i le sauniga ma le aloaia o le latou taunuu atu e tagata Maoli.  O le agaga maualuga o le SSIG ia faailoa le latou solo tetee e faaaogāina ai le media latou te momolia i isi atunuu o le lalolagi auā e lei popole tele pe iai le Palemia o Samoa pe leai.

O le solo tetee a Maoli na avatu a latou faailoilo (signs) e faailoa ai lo latou tetee ia latou fanua lea ua leiloa talu ai le feagaiga lea, e faapena foi la i le auai atu o le SSIG e faaali a latou faailoilo e tetee atu ai i le tulafono a le LTRA 2008 lea laa alu ese atu ai fanua faaleaganuu o Samoa.

O le agaga fiafia o Maoli i le feiloaiga ma le faalapotopotoga a le SSIG, na latou iloa ai e tutusa lelei manaoga o loo iai latou ma le manaoga o loo iai foi tagata Samoa.

Ma o le sootaga lelei lea ua taumafai iai tagata Maoli ma tagata Samoa e tetee atu i le malo ina ia aua ne’i afaina fanua faaleaganuu.

E silia i le 20 sui o le SSIG sa malaga atu i le nofoaga sa faamanatuina ai le Waitangi Day faatasi ai ma le latou loia le susuga ia Fina’i Bernadette Ah-voa.

Ua iloga le faafiafiaina o le SSIG ina ua mafai ona faataunuuina le solo tetee ma ua maimoa ai foi le tele o atunuu o le lalolagi ina ua faasalalau e le media a Niu Sila.