E taunuu atu le loia a le SSIG le tamaitai ia Josie Fuimaono-Sapolu faapea sui o le SSIG i le fale faamasino mo le fofogaina o le latou tagi faasaga i le Malo, lea na fuafua e valaauina i le Aso Gafua, 26 Fepuari i le itula e 2pm, o loo pipii mai le faasilasilaga i le faitotoa, ua toe tolo le mataupu i le taeao o le Aso Lua 27 o Fepuari i le itula e 10am
Na fesiligia le tamaitai loia, pe na logo atu o ia e le Lesitala ua toe tolo le faamasinoga, ae na saunoa Josie, e leai, e lei logoina o ia, o loo faate’ia ina ua taunuu mai o loo pipii atu le pepa i luma o le faitotoa o le potu faamasino ua tolo le faamasinoga. E peiseai, o se faaiuga na faia faavavevave le toe tolo o le faamasinoga, fua ina lē logoina le SSIG. E lei maua se feiloaiga ma loia o loo tulai mo le Malo, pe na logoina latou e le Lesitala pe leai foi. Na ta’ua e le tamaitai loia a le SSIG, e leai foi se mafuaaga ua faailoa atu i le tolo faafuasei ai o le faamasinoga.
O le itu e faanoanoa ai le SSIG, ona e toatele ona sui e malaga mamao mai Savaii faapea foi afioaga i tua, e taugata pasese o feoaiga, ae o lea ua tolo le faamasinoga. E pau le itu o loo mafanafana ai le tamaitai loia ia Josie Fuimaono-Sapolu ma sui o le SSIG, o le taeao o le Aso Lua ua faatulaga e valaau ai le mataupu.
O le valaauga lea o le faamasinoga o loo faamoemoe e tuuina mai ai se tali a le itu tetee, faasaga i suiga o le tagi a le SSIG, e pei ona toe faaopoopo ai le afioga ia Tuiatua Tupua Tamasese, lea sa avea ma Ao o le Malo faapea foi le faletupe a le Asian Development Bank, i le lisi o i latou o loo faasaga iai le tagi a le SSIG. Ua mageso tino o tagata i le fia iloa pe o le ā se silasila a le faamasinoga i le mataupu lenei, ae pe faamata foi o le ā se silasila a le faamasinoga i mafuaaga o le tagi a le SSIG. O le lomiga a le Samoa Times i le vaiaso fou, o le a lipotia ai taualumaga o le faamasinoga e pei ona fofogaina i le vaiaso nei i le faamasinoga maualuga i Apia.
