O upu ia na faamatalaina ai e le susuga ia Jason Thompson o Sydney, ona lagona ma lona mitamitaga ina ua tatafiina Sa o Su’a ma le Aiga Sa Su’a, i le lagona ootia ina ua mae’a ai fita ma tiga sa ia feagai ai, i le Laei ma le Tatau a Tamatane o Samoa.
O le aoauli o le Aso Toonai 2 o Fepuari 2019, i le maota ta tatau o le susuga ia Su’a Suluape Petelo i Saint Claire, na taualuga iai le galuega a le Matuaofaiva, auā le samaina o le tatau ma tatafiina ai foi le Lamasa a Su’a e pei ona masani ai lea galuega ma ia faiva.
O se sauniga foi na faamatalaina e le susuga ia Jason e faapea, “E ui lava ua faitau tausaga o lea moemitiga ma o se moomooga foi nai lona loto mai lona itiiti, ae sa ia vaavaai lava i se tufuga na te faataunuuina lea moemitiga. E ui foi ina pei o le vaa o Toilolo e lē iloa pe alu i luma pe alu i tua, ae faafetai i le Atua ua ia taoto lava i le Tufuga o Tufuga.”
O se saunoaga lea a Jason i le tatou nusipepa. Na ia ta’ua foi e faapea, “E tele taimi na faaosoosoina ai o ia ona o nisi o tufuga talavou o latou faatinoina lea galuega i Ausetalia. O nisi foi o taimi ma tausaga, sa ia sauni ai mo le atunuu e faatinoina ai, ae o se tasi lava o ana uo i le galuega, e na te fautuaina pea ia ina ia aua le faanatinatia, aua e lē se galuega a sese ona toe titinaina lea. Auā a pipii loa i lo’u tino ae iai ni faaletonu, o lona uiga ou te alu lava ma a’u ia faaletonu i le tuugamau”.
Fai mai a Jason, o se tasi o aso na ia alu ai i se fiafia sailitupe a le Ekalesia Katoliko, na sisiva ai nisi o sogaimiti ma a latou tatau mananaia, ae peitai na filo ai ma se tasi o alii talavou na mulimuli ane i le siva ma aiaiuli ai loa, ma o le uso tonu lava lea na ia fesili loa iai, ona e tulaga ese ai lava le matagofie o lana tatau. Ma o ia tonu lea na ia fesiligia loa poo ai le tufuga na taoto ai, ae fai mai le tali, “I was been tattooed by the Master.” (Na ou taoto i le Faiaoga o Faiaoga) ma ia ta’ua ai loa o le susuga ia Su’a Suluape Petelo o loo alala i Saint Claire”.
Fai mai le susuga ia Jason, “O le amataga lava o le vaiaso na sosoo ai, na matou o ai loa e saili le maota o Su’a ma tatalo loa iai ou te fia laeia le tatau a Samoa, ma o se lesona tele lava na ou a’o mai ai loa ia Su’a ma ou iloa ai e lē na’o le manao lava i le tatau ma maua lata tupe ona ioe gofie ai lea o le susuga ia Su’a. Ae na matuā faamanino lelei e Su’a ia te au le tāua o le Malofie ma e lē o se taaloga foi. E ao foi ona ou mafaufau iai, pe ua ou nofo sauni e faia lea faatoina mo le faatinoina o le taina o la’u tatau”. O se molimau ola lava lea a le susuga ia Jason.
O le susuga ia Jason Thompson na soifua a’e i Samoa i le motu o Salafai i Safune ma si ona tuaa i le latou faatoaga o manu papalagi, ae mulimuli ane toe malaga ane ai lea i lo latou aiga i Ulumotootua ma amatalia ai la latou atina’e lafumoa i Afiamalu seia oo ina faatama’ia uma e le Afā o Ofa i le 1991. O le tausaga lava foi lea na latou malaga mai ai i Ausetalia ina ua faatoa 16 ona tausaga.
I le tausaga 2003 na amataina ai loa lana lava kamupani faufale ua faaigoaina o le “Thomsen Building Services Pty Ltd, i tulaga tau i fale tetele o kamupani ma fale o aiga (commercial buildings & family homes), ma e toatolu lana fanau matutua mai lona toalua muamua, tamaitai uma. O Celeste 21, Carolina 19 ma Cecilia 17. Ua toe faaipoipo i le tamaitai o Suzannah ma ua faamanuiaina foi i laua i se fanau tama e toalua.
O Iasona e 5 tausaga ma Ilalio e tasi le tausaga, ma si a laua tama teine e faamoemoe o le a fanau mai le masina o Mati, ae talosia i le alofa o le Atua.
O ona tuaa, o le afioga ia Fonoti Molesi Thompson mai Satalo Falealili ma lona tina o Josephine Cecilia Rasmussen mai le afioaga o Fasitoo-Tai. O ia foi o le uso i le afioga ia Patele Maurice Thompson o le Faifeau Pule i le Palisi a Revesby ma Panania, a’o le Faifeau Faauluulu foi i le Itupa Samoa o le Puleaga Faaakiepikopo a Sydney.
I le faamavaeina o le galuega a Su’a ma lona aiga, sa molimauina lava lea e le afioga ia Fonoti Thompson, le tuaa o le susuga ia Jason, aemaise o si ona faletua ma si ana fanau.
Na momoli foi le faafetai tele a Jason i le susuga ia Su’a Suluape Petelo ma ona alo ia Michael Suluape ma Charlie Suluape, ona o la latou galuega fita ma le matagofie ua matuā iloga ai lona mitamita o ia o le tama Samoa, ma lana ta’utinoga, ua avea le pipii o le laei Samoa i lona tino, ua fai ma lu’itau ia te ia, ina ia agai loa e faamautuina lona malamalama i Tu ma Aganuu mamalu a lona atunuu pele o Samoa. Na ia faafetaia ai foi le tapuaiga a si ona Tuaa ma nai ona uso ma tuafāfine, aemaise lava i si ona toalua ia Suzannah ma si ana fanau.
E momoli atu ai foi le faamalo a le Sui o le Samoa Times i le susuga ia Jason Thompson, ona o le avanoa ua maua e molimauina ai lona faamoemoe.
Ia ua faamalo le onosai auā o le taunuuga lava o le FIAFIA.
