Mafatia Ueligitone malosi le Mafui‘e

O le Aso Faraile na tea nei na amata ai ona faasolo le lulu a le mafui‘e i le laumua, peitai na faapena lava ona saga saputu mai i le Aso Toonai ma le Aso Sa na tea nei.
Sa fai si puupuu o le taimi na lulu ai i le Aso Faraile faapea ma le Aso Toonai e ui ina faasosoo, peitai o le afiafi o le Sapati na faatetele ai ma sa faapea o le a pa‘ū le falesa i le taimi lea na fai ai le lotu faaleaiga o se tasi tiakono i Porirua.
O le fuataimi i taimi o aoga pese a se tasi falesa mo lea maliu, na matuā savali faatopetope mai i lalo ae tuu le taimiga o viiga ina ua lulu malosi le mafui‘e. E faapena foi i le tapiano ua tia‘i le piano ae oso mai i le nofoa o le aufaipese, talu ai ona ua lulu atoa le falesa faatasi ma le piano.
Na feei isi tagata i totonu o se tasi potu o le falesa ma tau laga i fafo, ae taunuu mai le failautusi ma faamatala o lana taavale foi ua matuā felueai solo i fafo ina ua taunuu e paka ae sau i le lotu. O isi tagata ua fai i le failautusi pe mafai ona o i totonu ae tali atu le failautusi: “O mai i totonu o le falesa, e lelei lava le feoti a o lea e tanu uma i le falesa”.
O le po foi o le Aso Sa e faafā lava ona lulu ma e lei malosi ae pei e tuu tase‘i i isi taimi. E oo mai i le taeao o le Aso Gafua, o ananafi lea, sa toe lulu ai foi a o lei taina le 11 i le taeao.
O le taeao foi ananafi na faasalalau ai i le TV ma leitio ina ia aua ne‘i malaga atu nisi i le taulaga ona o fale tetele ma maualuluga e lē o saogalemu mo galuega ma a‘oga.
Ua tapunia foi nisi o faleaoga faapolitekinika i le laumua ona o le mafui‘e lava ma ana faiga sauā. E tele foi ni toleniga o lakapi a fanau ua lē oo ona o le leaga o le auala ma lē saogalemu mo feoaiga.
Sa faate‘ia foi le sui o le Sooatulau i le usu mai i le galuega ua fola atu ipu tuuteu mata‘eta‘e ua ta‘ei uma ina ua toulu i lalo i le mafui‘e. O ata ua sisipa ma toulu ifo i lalo mai tulaga sa iai. Ae o le mea sili e lē o faalogoina le maumau o se ola o se isi i nei faiga malolosi a galuega a le Silisiliese.
E ese foi le mālie o tala na ta‘ua mai i le Siufofoga o le Laumua i se isi tina matua ma le valaau atu i tamaiti ina ua laga i lalo o le laulau i lo latou aiga: “E! o ese ma le laulau o lena e gau le vae”. Ia ua leiloa la poo fea a sulu i ai le fanau.
A o atu i fafo e lelea mai lava ni apa ma pauu mai ni laau lavevea ai. E faigata foi i tagata puputa ona laga i lalo o laulau poo moega ma faitotoa ona e fia maua uma e tagata le faitotoa ona o faatonuga ia a le ‘au vaaitau poo mala faanatura.
Ia tatou talosia ia ‘aua ne‘i toe lulu mai nisi mafui‘e ona ua pologa lava le laumua, fai o le malulu tele o lenei tausaga ma matagi malolosi faapea uaga faalausosoo, ae o lenei foi ua toe saputu mai ma le lulu o mafui‘e.
Talofa e, ai o le mala lea na feagai ma Kalaiesetete ma ona tagata lea ua amata ona faasolo mai i le laumua. Ia e tofu lava si ta ma si ona mafuaaga. E leai lava sē failoto i galuega mamana a le Atua, pau lava o le nofo tatalo pea ma saga vivii e lē aunoa.