$84,817.00 aao foai o Samoa i Brisbane mo EFKS Poutasi Falealili

Ua moni upu masani, ua fesilafai i luma o nuu ae lē o tua o nuu. E pei ona teuteu ala ai lana auauna i le amataga o le masina o Iulai ma to‘ai taunuu mai foi sui o le Ekalesia EFKS a Poutasi Falealili, auā le posiva e pei ona loma ma faataunuuina i le Aso Toonai 20 o Iulai.
Ua tau lau o le faamoemoe ma ua atoa tupe i le fafao i le teu faatupu ma le faatamalii a le atunuu, talu ai ona o se manaomia e ala i le malu ma le hall faapea nisi vaega fia faaleleia a le Ekalesia EFKS i Samoa, lea na afua ai le masii mamao mai o sui o le aulotu ma talo ai se feiloaiga auā le manaomia.
Na molia laau i fogaa e le susuga i le toeaina o le ekalesia EFKS Southwest, (toeaina taitai o le pulega a Saute) Rev Tauaaga Mataafa. Na alo i sausaunoaga e pei ona tatalaina e le afioga i le Sea o le Ekalesia Evagelia Uesiliana Metotisi, Rev Lafaitele & Kelly Mika, faasolo siva Samoa ae sa potopoto faapea alo ma tamafanau paolo ma gafa a le alalafaga i Brisbane nei.
Na faia le faatafiti i sausaunoaga a faafeagaiga o le pulega EFKS ma le Matagaluega faapea nisi faafeagaiga, aemaise le Toeaina Faatonu ia Rev Kerita & Binary Reupena & Ekalesia EFKS Ipswich ma le loaloa o le atunuu, ona o le agaga fia fesoasoani, taualuga i le sausaunoaga a le susuga i le Toeaina ia Tauaaga ma  Senerita Mataafa, sa lagolago malosi i le faamoemoe.
Ua moni ai upu e fai i le itumalo “Ua ta fia Falealili fua”, auā na pa‘au mai alo ma tamafanau, paolo ma gafa mai ‘i ma ‘o e opogi le faamoemoe. O le afioga ia Tupuola Simona sa fai ma pule o le tausamaaga ae feagai le failautusi mai Samoa ma faaaloaloga (fetalaiga ia Vaataumai Vaeila Suesue).
Sa fai ma sui o le alalafaga o Poutasi i Brisbane nei le fetalaiga ia Vaeila Nofoituaiga Luafutu e tu tootoo e faaleo se agaga faafetai ona o le aao mafola o Samoa ua talisapaia ai faatuaeleele lenei seleni paia e $84,817.00.
Sa fai le fofoga o Lealuga le fetalaiga ia Aumua ma sui o le ekalesia EFKS Southwest ma le auvalaaulia e faafetaia le mafutaga ma le ekalesia a Poutasi ona o le maualuluga o faaaloaloga, aemaise le maniti a tamalii ma le toga paia sa folasia.
O le taumafataga lava saunia ma tapenaina lelei sa saunia e le uncle Sam’s Take Away, le tofa ia Poulava Sam ma Lona Matautia, o se tasi o sponsor malosi a Poutasi i lo latou faamoemoe.
O sui na malaga mai e aofia ai le afioga ia Meleisea Seti ma Meleisea Saivaega o taitai ia o le aumalaga poo Sa‘o o le nuu, o le failautusi a Poutasi EFKS le fetalaiga ia Vaataumai Vaeila Suesue. Na malaga mai foi faletua o tiakono, Valasi Afi‘a Tauloa; Samalaulu Saina Tuatagaloa ma Te‘o Alaifetu; susuga ia Samuelu Toelupe; Uiti Lagavale; ma le faifeau tausi aiga o Rimoni Wright faapea Lesa Toilolo Niualuga Evaimalo.
E iai le talitonuga o se agaga fiafia i le auauna a le Atua ma le faletua o loo faamuli mai pe a toe taliu atu le faigamalaga ma le seleni paia, lea e toe foi i Samoa i le Aso Toonai aso 27 o Iulai. Viia lava le Atua i mea uma lava.