O le malaga mai o le pulega a le Samoa A i le faaiuga o le vaiaso e filifili nisi o tama taaalo i Aukilani i totonu o le taamilosaga a le Aukilani Samoa na faamautu ai ma faamausali le sootaga poo le feagaiga vavalata a le Aukilani Samoa ma le iuni lakapi a Samoa.
Pei ona saunoa le faiaoga a le Samoa A le afioga ia Muliagatele Brian Lima o le mafutaga lenei e lē toe motusia auā o lea ua malaga mai i lenei tasuaga mo le filifiliaina o tama taaalo i Aukilani nei mo le ‘au a le Samoa A i taamilosaga o loo loma nei ma famautu ai loa le sootaga lenei o iuni lakapi e lua. Ma ua iai foi le talitonuga o le pulega o le Samoa A, o le avanoa lelei lenei e maua ai avanoa o alo ma tamafanau o Samoa o loo taaalo i Niu Sila nei e saili ai so latou avanoa i ‘au a le atunuu e pei o le Samoa A ma le Manu Samoa.
O le tali atu a le iuni a le Aukilani Samoa i le faamoemoe o le iuni lakapi a Samoa i le faaiuga o le vaiaso na iloga ai le tumutumu o le malae i Magele i tua o le Pack N Save i le mamalu o le atunuu na autovaa atu e molimauina ma tapuaia taumafaiga o latou alo o loo saili so latou avanoa i le Samoa A.
O le taimi muamua lenei ua tupu ai se tumutumu faapenei i le mamalu o le atunuu i le filifiliaina o tama taaalo i totonu o le Aukilani Samoa. Ae pei ona ta’ua e le afioga ia Muliagatele Brian Lima sa iai le taimi muamua sa fai ai le filifiliga o tama taaalo atu iinei i Niu Sila, ae lei faapea le lolofi atu o tagata ma le finau atu o tama taaalo. Peitai o le polokalame lenei ua agai mai ai le Samoa A mo le sailia o ana tama taaalo ua iloa ai le finau atu o fanau e faatāua lea avanoa.
O lana maitau foi i le faatinoina o le taaaloga atoa i le Aso Toonai e faafaigata lava se latou filifiliga ona sa lelei uma le faatinoina e tama taaalo o le taaloga aemaise ai o tulafono ma le faagaioiga o le polo e pei ona masani ai le taaloga. O le filifiliga foi o tama taaalo e fai lava i le lelei o tapenapenaga a le tagata lava ia ma le faaaogāina o le taaloga. Aemaise ai ia lava le mānava ma lelei le mafaufau.
O le polokalame lenei ua taumafai iai le taiulu a le Manu Samoa ma le pulega a le Samoa A, o le taumafai lava lea e apoapo atu fanau ua lē mafai ona ausia so latou avanoa i le super rugby ma le mitre 10 cup, ina ia aua ne’i lusi lo latou fiafia e faatino le taaloga aemaise ai o le taleni mai le Atua.
O le faamoemoe ma le auga o aute o le loto o le Samoa A, ia mafai ona filifili atu fanau nei e taaalo i le ‘au a le atunuu o Samoa. O le filifiliga (trials) o tama taaalo i le Aso Toonai mo taaloga o loo loma nei a le Samoa A, e iai ma le avanoa e ono maua ai ma se avanoa o fanau nei mo le Manu Samoa, auā o lea sa malaga mai foi le faiaoga a le Manu Samoa le susuga ia Steve Jackson.
Lea foi ua iai ma le taamilosaga o le Global Rabee Rugby lea ua ofi atu iai le ‘au a Samoa i totonu ma e tele lava la le avanoa e maua e fanau nei e taaalo ai mo le ‘au a le atunuu ina ia aua ne’i lusi ai le taleni. Faatasi ai, o le fiafia e taaalo i le taamilosaga a le Aukilani Samoa ao la e iai le isi sitepu o le olaga taaalo o loo finau iai le tama taaalo. O se faamanuiga ua maua e tamafanau o Samoa o loo taaalo i fafo e tepa taulai iai lo latou ola taaalo mo le lumanai.
Ua mae’a filifili le tama e 21 i totonu o le Samoa A aua ana tapenga i taaloga o loo loma nei ia Mati.
