Ua atili faigata le galuega a le Manu Samoa mo le Ipu o le Lalolagi (R.W.C.) ina ua faamavae Zane Hilton mai le Samoa Rugby Union (S.R.U.). O Hilton na vaaia ‘au uma a le S.R.U. mai le U20’s, ma le Samoa 7s, Samoa A, ma le Manu Samoa. O le sini o lana galuega o le vaaia lea o le High Performance Unit a Samoa Rugby, o lona tofiga foi lea o le Pule Sili o ‘Au a le S.R.U.
Peitai, ua sameme nei le faamoemoe a le Iuni lakapi ma le aufili a le atunuu ina ua faafuaseia le alu ese o Hilton mai le galuega. E tele vaega o le galuega a Hilton, o ia e vaaia le faafaileleina o tama taalo a le Iuni atoa mo ‘au maualuluga ae maise ai lava le Manu Samoa. O le faavae lava lea o Iuni uma o le lalolagi o totonu o le High Performance Unit (H.P.U.). O Hilton na faasoaina le taleni lakapi i totonu o le atunuu i le Samoa 7s ma le Manu Samoa.
O galuega uma e faia i lalo i le U20’s ma le Samoa A e mo le manuia lea o ‘au autu ia a le atunuu. E le gata i lea, na te vaaia foi ma le taleni lakapi a tama Samoa o loo taalo i atunuu mamao ma fautuaina ai le faiaoga o le Manu Samoa ia Steve Jackson i tama e ao ona saofia i totonu o le ‘au.
O ia e vaaia polokalame uma a tama taaalo nei e aofia ai ma le faatonuina o togafitiga ma fofo o manu’aga ma faaletonu o loo feagai ma tama taaalo i Samoa ma atunuu i fafo ma ave foi lana fautuaga ia Jackson ma Sir Gordon Tietjens le faiaoga o le Samoa 7’s i le saogalemu o tama taalo uma mo le malae. Ae o lea la ua faaletonu ina ua faamavae Hilton mai lona tofiga.
O le vaiaso na tea nei na momoli ai i le ofisa o le S.R.U. lana tusi faamave. O lea tusi e lei ta’ua ai e Hilton le mafuaaga o lona alu ese. Ae na ia faafetaia le avanoa na tuu atu ia te ia e le Iuni. Na mulimuli ai ona faailoa e Faleomavaega le Faatonu o le S.R.U. i le tulaga ua faamavae ai Hilton mai lana galuega. Fai mai le Faatonu e foliga ua maua se isi galuega a Hilton e galue ai.
O le alii nei na faatoa faigaluega i le S.R.U. i le masina o Me 2018. O le Melbourne Rebels na galue ai o ia mo tausaga e lua. A’o le tele o isi tausaga na faiaoga ai o ia i le Lakapi i atunuu i fafo e iai Iapani ma totonu o Europa. E foliga mai o lona taimi i totonu o le S.R.U. na faaaogā lea e faatalitali ai se isi ana galugea. O se tulaga na fesiligia ai le Taitaifono o le Iuni le Afioga Tuilaepa Sailele Malielegaoi, na tali ai le Palemia atonu ua maua se ofa e telē atu ai a Hilton e faiaoga ai i se isi ‘au.
Ua taufetuli ai nei le S.R.U. ma le World Rugby e saili se tasi e sui ia Hilton a’o loma le R.W.C. Na ta’ua e Steve Jackson le faiaoga o le Manu Samoa, o le a lē tuua ai le fesiligia e ia Hilton i tama taalo ua uma ona ia suesuea ma faafesootai mo le Manu mo lenei tausaga.
O le masina o Iuni e amatalia ai taaloga tapena a le ‘au mo le Ipu i Iapani. Atonu o loo iai pea le taimi e ofi ai ma se isi e sui ia Hilton i le H.P.U. A’o faatali lea suiga ae o le a taumafai pea le Iuni e faaauau pea galuega tāua mo le atina’eina o le Lakapi mo aufili a Samoa.
