Afai e lē atina’e i Ieova le fale, e galulue fua i latou o e atina’e, afai e le leoleoina e Ieova le aai e mataala fua o lē na te leoleoina. O le agaga moni lea ma le aano tonu o le sauniga lotu poo le lotu talosaga lea sa faataunuuina i le taeao o le Aso Toonai ua mavae i le maota o Samoa i Magele, o le taumafai lea e tutu faatasi tagata uma e siitia i le Atua galuega ma tiute amata o lenei tausaga, e le gata i tiute faalemalo, o galuega a kamupani ma pisinisi aemaise ai foi o tiute a aiga. Ua lē faapito la manū ia tasi, ae ua tatala le avanoa i tagata eseese o le Pasefika e mafai ai ona auai uma mai e tutu faatasi i le loto e tasi, mafaufau e tasi ma le agaga e tasi e siitia tiute ma galuega o loo feagai ai ma le atunuu i lenei tausaga.
O le talitonuga a le afioga i le Minisita o tagata atumotu o le Pasefika ia Aupito Su’a William Sio e iai faigata ma fita o le savaliga e iai foi mea e tutupu i le folauga lenei o loo iai, ae o le faalagolago ma le tuu i le Atua o mea uma, poo le lava faigata ma fita o le olaga e le mafai e nei mea ona tutupu ona ave esea mai i tatou ma le matagofie o le Atua, ma o le Atua foi o le tautai lea o le folauga i le tatou vaa i lenei tausaga. O le susuga i le faafeagaiga ia Fakaofo Kaio o le taitai aoao o le ekalesia PIPC i Niu Sila na ia taitaiina le sauniga ao le afioga i le Minisita ia Aupito Su’a William Sio na ia faafeiloaia le mamalu o sui eseese o le Pasefika sa auai. E ui i le eseese o lanu ma gagana ae ua avea tagata uma ma tino e tasi ia Keriso ina ua tulai lava le sui latou mai lea atunuu e faaleo le loto o le faafetai ma le viiga o le Atua e ala i le tatalo na saunia i le latou lava gagana. O le faamoemoe lenei ua lua ai nei o tausaga talu ona faataunuuina e pei ona iai le lagona o le Minisita o tagata atumotu o le Pasefika ia faia se sauniga faapenei i tausaga taitasi e siitia ai galuega fai a tagata o le Pasefika o le aumau i Niu Sila i le Atua.
Matagofie le auai atu o tagata o atunuu eseese o le Pasifka ua le gata i susuga i faafeagaiga ma o latou faletua ae ua oo foi i faauluuluga o pisinisi ma kamupani o alo ma fanau o Samoa ma tagata o le Pasefika o loo iai a latou auaunga o loo tautua ai le atunuu. Sa faapea foi ona auai atu iai ma le afioga i le Konesula o Samoa ia Faolotoi Reupena Pogi faapea ma sui o le Local Boards i Magele faatasi ai ma aiga. O le avanoa foi lea sa mafai ai ona fofola e le afioga i le Minisita o tagata atumotu o le Pasefika nisi o galuega o lea ua mafai ona oo iai le tautua a le Labour talu ona tulai mai i le taitaiina o le malo o Niu Sila.
O le paketiina o tupe tasi lea vaega ua agai iai le malo i ana polokalame i lona faaaogaina, pei ona iai le amataina o le fausiaina o fale, amata le faatupeina o le vaega o le matagaluega o le soifua maloloina, o aoga ia siitia le tupe maua o lea ua agai iai ao lea faatoa tasi le tausaga talu ona tulai mai le faigamalo.
Saunoa foi le afioga ia Aupito Su’a William Sio, o se avanoa lelei lenei e tuuina atu i le atunuu e aumai ai ni a latou fautuaga pe faufautua mai ai i Minisita ma faipule o le malo ise latou lagona i le tautua a le faigamalo o loo iai nei. O le tāua la o lenei lagona i le Minisita ina ia iloa ai o nei galuega uma o loo faailoa mai ai o loo manuia tagata ma fiafia tagata uma i le galuega o loo faatino e le malo.
Na faaiu polokalame o le taeao i le ipu ti na faauau ai le mafutaga ma talatalanoa ai tagata mai atunuu eseese o le Pasefika i le taua o lenei sauniga.
