Au a le Afaluko mai Samoa ma Niu Sila nei

Au a le Afaluko mai Samoa ma Niu Sila nei

O le taimi muamua lenei ua malaga mai ai le aukirikiti a le Afaluko mai Solosolo i le taamilosaga a le PIMK i Aotearoa nei, na mafua lea malaga ona o se valaaulia na tuuuina atu e le afioga i le peresetene ia Sola ma le komiti a le taamilosaga a le Pimka i le Afaluko e malaga mai ai e molimauina le matagofie o le taamilosaga o loo faagasolo nei i Aukilani, ma atonu e iai foi se suiga o le latou taaalo i taaloga i Aukilani ma Samoa i le faagasoloi lava o lenei taamilosaga.

O le tali mai o le Afaluko i lenei valaaulia na malaga mai loa le latou au, ma e toafitu sui o le ‘au na malaga mai ae sa taitai mai e le afioga ia Patele Muliau Stowers auā o ia lea sa faatoai atu iai le valaaulia.

O nisi o le ‘au ua lē mafai ona paau mai ona o le tuatuagia i galuega ma e iai foi nisi sa faafaigata ona fai pepa e malaga mai ai, ao le vaega e sili ona taua o le maua o le avanoa e auai mai ai le ‘au a le Afaluko e molimauina foi le taamilosaga o loo aave atu tala i Aukilani. Pe toaititi lava i latou na malaga mai ae o le avanoa o le mea e pito sili ona taua. Saunoaga lea a le afioga ia Lemusu Mulinuu Pulepule o le peresetene o le ‘au mai Samoa.

O le Aso Toonai muamua na tatala aloia ai le taamilosaga na momoli ai se faaaloalo a le Aafaluko i le komiti a le PIMKA e ala lea i le latou faaula i ula fala faatasi ai ma le ie o le malo sa tatalaina ma sa faaigoaina lea ie o le mafutaga e le toe motusia, ma e tatau pea ona faaauau pea lea mafutaga i tausaga uma.

O le famoemoe maualuga a le susuga ia Lemusu Mulinuu Pulepule e faaauau pea le malaga mai o le ‘au a le Afaluko i lenei taamilosaga auā o lea ua latou molimauina le tele o le eseesega o le faatinoina o le taamilosaga kirikiti i Samoa ma le taamilosaga iinei.

O le taaloga a le PIMKA, o le taaloga o mafaufauga e faaaogā iai metotia ma le mafaufau o le kapeteni ma le ‘au atoa. O le latou auai mai foi i lenei taamilosaga ua iloa ai e iai nisi vaega o le taaloga e ao ona latou aoaoina muamua, ae pei ua avea le manaia o le valaaulia lenei ua mafai ai ona aoaoina i latou i le faagasoloina o le taamilosaga ma lona faatinoina, auā a toe malaga mai ai i le tausaga fou ma isi tausaga ua faafaigofie loa ona taaalo i le taaloga.

O le talitonuga foi o Lemusu Mulinuu Pulepule e tele lava le eseesega o le faatinoina o le taaloga i Samoa ma Niu Sila, ma o le mafuaga foi lea o loo tau faaletonu ai lana ‘au i le tele o taaloga ona e lē o masani nisi o tama lelei na omai Samoa i le faagaioiga o le taaloga.

E ui lava la e lei tuuina mai se tali mai le komiti ma le laulau o le taamilosaga a le PIMKA i le talosaga sa tuuina atu e le Afaluko e toe fia o mai pea i tausaga uma ae e iai lava le faamoemoe o le peresetene ma nisi o sui o le ‘au sa malaga mai e fia auai mai pea i tausaga uma.

Ma e loto tetele foi le ‘au mai Samoa e saili pasese e malaga mai ai, ae atonu foi e oo atu ai i le isi taamilosaga ua masii mai loa le toatele o tama taaalo.

O nisi o alo ma tama fanau o Solosolo o loo aumau i Aukilnai nei sa latou faia le ‘au a le Afaluko i le taamilosaga lenei lea ua tuufaatasi ma tama mai Samoa ma faatinoina le faamoemoe o le Afaluko e pei ona malaga mai ai.

Iuga o Taaloga Aso Toonai 2

‘AU ALII

Laulaau mai Farani manumalo ia Riversdale,

Kobra manumalo ia PIC Papakura,

Povi Po’a manumalo Tama o le Meko

Loto Taumafai manumalo Maata

Malaka manumalo Ainiusami

Ao Atua manumalo Amoa i Sisifo

Tama o le Papa manumalo ia Riversdale

Kobra manumalo i le Lau laau mai Farani

Maa Pupula Manumalo PIC Papakura.

Tama o le Meko manumalo ia Afaluko

Maata manumalo Mountains Boys

Malaka manumalo Loto Taumafai

Povi Po’a manumalo Ainiusami

Ao Atua manumalo Riversdale

Tama o le Meko manumalo Maata

Malaka manumalo Mountain Boys.

‘AU TAMAITAI

GI Katoliko manumalo Nifoloa

Ao Atua manumalo Madam Onyx

Amoa i Sisifo manumalo Nifoloa

GI Katoliko manumalo Teine o le Papa

Black Widows manumalo Madam Onyx

GI Katoliko manumalo Ao Atua

Amoa i Sisifo manumalo Teine o le Papa

Black Widows manumalo Ao Atua.