Toe filifilia mo le Komiti o Mataupu Tau le Aufaigaluega le susuga ia Rev Elder Tauaaga ma le faletua ia Senerita Mataafa mo le Matagaluega a Kuiniselani i Saute

Na muai molia i talosaga le faamoemoe o le matagaluega EFKS Kuiniselani i Saute e pei ona feagai ai i le Aso Faraile ma le Aso Toonai. O le matagaluega (Matagaluega a Kuiniselani i Saute) na malaga mai ai sui mai le ekalesia aoao i Samoa, ma faatuina talu mai le tausaga e 2015, ma lua ai loa matagaluega a Kuiniselani, e ese mai le matagaluega na uluai faavae mai, lea lava e igoa i le Matagaluega EFKS Kuniselani. 
O le mae’a ai o le Tofiga a Faifeau ma A’oa’o, i le afiafi o le Aso Faraile aso 7 o Fepuari, ona alo loa lea i le filifilia o le Komiti o Mataupu Tau le Aufaigaluega. Sa faigofie le filifiliga, auā na auai le Mana o le Atua na afua ai ona sologa lelei mea uma.
E to’a 14 Faifeau tausinuu sa filifilia le Komiti lea, ma o se tala fiafia na toe faamanuiaina ai le susuga ia Rev Elder Tauaaga i le filifiliga i le tofi tāua lea. Na amata tu mai le foe i le uluai taimi na tatalaina ai le matagaluega le susuga i le Toeaina ia Tauaaga Mataafa, e tailima tausaga ma faia suigatofi, lea ua toe faamanuiaina ai foi i le tofiga lea mo le isi lima tausaga (KMTA) Komiti o Mataupu Tau le Aufaigaluega.
O le Aso Toonai na sosoo ai, a’o faagasolo pea le Tofiga mo le lua aso, ina ua mae’a ona talanoaina ma faaiugafonoina mataupu, ona taualuga lea i le sailia o se tofi Tiakono Toeaina, O le nofoa tasi a le matagaluega, o le faauluuluga foi lea o tofiga a tiakono. E pei ona silafia o le susuga ia Ofoia Lemamea na seei mai le tofi faatasi ma le faletua ia Apaula Lemamea, talu mai le 2013 a’o tasi le matagaluega a Kuiniselani, peitai ina ua vaeluaina i le 2015, sa toe faaauauina pea le tofi lea mai lena taimi i le Matagaluega EFKS a Kuiniselani i Saute.
O le filifilia o le tofi lea o le Tiakono Toeaina, e tailima tausaga ma suia, ma o le tofiga lea e palota uma e usufono a le Matagaluega. Sa lei faigofie lea filifiliga auā o le uluai filifiliga lenei o se Tiakono Toeaina talu ona faavae mai lenei Matagaluega, peitai na auomanū lava ma maua le tasi.
  O le tiakono Toeaina ua manumalo i le filifiliga mo le isi lima tausaga, ua tulai mai ai le afioga ia Fiu Vaigafa. E lē o se uluai taimi lea ua pale mai ai Fiu i le tofi, sa tulai mai, a’o tasi le matagaluega i le uluai taimi peitai, sa lei mae’a ona o tulaga tau gasegase i totonu o aiga. O le a faamaonia i le Fonotele lona tofi mo le lima tausaga ma amatalia ai ona tiute masani pe a taliu mai Samoa ia Me o le 2020.
Ua faamoemoe e faaauau pea le tofi tiakono toeaina o le susuga ia Ofoia Lemamea i le taimi nei seia mae’a foi le Fonotele i Malua ona suia loa lea.

Tiakono toeaina Fiu Vaigafa ma le faletua ia Nepu ua filifilia mo le Matagaluega Kuiniselai i Saute ma ua fuafua e faamaonia pe a maea mai le fonotele i Malua ia Me e amatalia ai o la tofiga