E lua masina ma le vaiaso e tasi ua faasala ai e le faamasinoga maualuga le alii o Kome Sioeli i lona ulufale faamalosi i totonu o le Iunivesite o le Pasefika i Saute, ma gaoi mai ai le meatuaolo a le Iunivesite e tusa lona tau ma le $200.
O lē ua molia e 19 tausaga i le taimi na faatino ai le soligatulafono, i le 2016, o Kome Sioeli e mai le afioaga o Vaimoso, sa ia taliaina ona moliaga i luma o le faamasinoga.
O lē ua molia e toafa i ai alii o loo tālia ai suesuega a le faamasinoga i le taimi nei ona o loo masalomia i le maliu o le alii faipisinisi Saina i Vaitele ia Oketopa o le tausaga ua mavae.
Sa faafofoga le faamasinoga i le tolaulauga a le faamasinoga i le lisi o soligatulafono a lea talavou, e amata mai lea a’o faatoa 17 tausaga.
O le taimi nei o loo falepuipui Kome i isi o ona moliaga, ae lē taulia ai le tele o tusi saisai (outstanding warrants of arrest) o loo iai i le lē tulai ai i le faamasinoga i taimi sa valaauina ai ia mataupu faasaga ia te ia.
E tusa ma le lima tausaga, o faia ai pea e lea talavou soligatulafono. O le tulaga o loo maitauina e le faamasinoga, o le solitulafono taatele i le lisi lenei o le talepe fale ma le gaoi.
Na amata mai lava i le 2014 ona solitulafono seia oo mai i le tausaga ua mavae. O se tulaga ua fesiligia ai se galuega o loo faia i nei tupulaga talavou e le vaega o falepuipui, ona e foliga mai e lē o iai se suiga i le olaga o Kome.
O le isi itu o lea ua vaaia ua lē na’o le alu e talepe fale ma gaoi, ae ua oo atu ina ogaoga le solitulafono faomea faaaupegaina, e pei ona faatino i le Saina faipisinisi i le tausaga ua mavae.
Ua faaāta mai ai mafaufauga o tupulaga talavou nei, na amata olaga i soligatulafono, lea ua faasolo atu ina ogaoga aafiaga o tagata lautele o le a maua mai ai. O le aso 3 o Mati o le tausaga nei lea o le a tolaulau ai foi le isi faaiuga a le faamasinoga i moliaga o le faomea faaaupegaina foi ma le umiaina o fualaau faasāina. Ae lē na’o le pau ai lea, o le a tulai foi lea alii i le vaiaso nei i le moliaga o le faomea, o loo masalomia ai ma sa tulai mai lea faafitauli ia Mati o le tausaga 2018.
