Talofa lava le atunuu pele Samoa! O ā mai lau folauga i lenei vaitaimi o le tausaga? Ia onosai pea ma lava papale o lea toeititi lava foi ona faaiuina lea o galuega o lenei tausaga ma tatou tuvae atu i le faaiuga o le 2010 latou ia. Malo lava le folau, malo foi le tapuai, faafetai tatalo.
Ua mae‘a atu se tasi o sui mai le atunuu, o se tamalii sa vaaia le aogā ma le tautua matavela e ala i galuega sa tofia ai ma galue ai mo le malo i totonu ma le va i fafo ma atunuu tetele o le lalolagi. Sa iloga ona tulai mai i lona foi vaitaimi, ma o loo iai pea lona naunautaiga e fia auauna pea ma galue mo lona atunuu a o maua le malosi pe afai e tusa ai ma le finagalo o le Matai.
Ua toe taliu atu i Samoa le afioga ia Toleafoa Tautulu Roebeck ina ua mae‘a nisi o tiute ma galuega faalotoifale sa malaga mai ai ma maua ai so tatou avanoa e feiloai atu i ai mo le fesoasoani mai i le tatou itulau.
O lenei vaiaso o le a toe liliu mai le tatou galuega i Niu Sila. O se tasi o tina ua loa ma ua leva foi ona tautua i galuega ma fesootaiga mo le manuia o tagata lautele.
O lona lea malosiaga ma ona tomai, atoa ai ma ona agavaa, ma ua faamealofaina ai foi e le Atua lona soifua e auauna ai.
Lupe Tofilau Eti Alesana-Vaofanua
Aso Soifua: Novema 6, 1946
Afioaga: Siumu, Poutasi i Falealili i Upolu, Lalomalava i Iva i Savaii
Na soifua a‘e Lupe i le afioaga i Siumu, mulimuli ane sa siitia ai i Lalovaea ma Lalomalava i Savaii. O Lupe o le alo tamaitai muamua, ma o ia foi o le alii o aiga ia i latou uma sa tutupu mai i le afioga i le Tootooalii, Tofilau Eti Alesana.
O se tamā foi o le atunuu sa tulai mai i le tofiga Palemia o le Malo Tutoatasi o Samoa i fatia e lei mamao atu, a o lei tulai mai Tuilaepa Sailele Malielegaoi o loo tu nei i matagiolo mo le faafoeina o le sā o Samoa, i le tofiga Palemia.
Soifua A‘oa‘oina/Aoga
O le aoga maualalo lava a le afioaga i Siumu, sosoo ane ai ma le aoga a Poutasi i Falealili, sa foafoa ma amata mai ai a‘oa‘oga. O tausaga mulimuli ane sa siitia ai le aiga i Apia, ma faaauau ai le soifua a‘oa‘oina i le aoga a le Ekalesia Aso Fitu i Lalovaea.
O le aoga lava a ekalesia i Lalovaea sa toe siitia i ai le isi laasaga seia oo ina faamanuiaina ma agai ane ai i le aoga a tamaitai a le ekalesia EFKS, i Papauta, poo Teine o le Papa e pei ona silafia ai.
E na o le tasi le tausaga sa mafai ona a‘oa‘oina ai i Papauta, ae toe taliu ma toe foi i Lalovaea, ma toe faaauau ai a‘oa‘oga seia oo lava ina mae‘a ma maua lana galuega.
