O le liliuina o lagona pogisa e susulu atu iai le malamalama pupula i olaga o fanauiti ua sauaina o loo tausia e le Toomaga mo ē Puapuagatia, o se meaalofa matagofie lea ua faatino e A’oa’o ma faletua o le vasega tausaga tolu o le Kolisi o Faafaifeau i Malua, a’o lumanai ai le Aso Sa o le fanau poo le lotu tamaiti i le Aso Sa o lumanai nei i Samoa.
O le liliuina o le pogisa e avea ma malamalama mo ia fanau a le atunuu ose autu na faaalia e le Toomaga ua fetaui lelei ma nai fanau o loo latou vaaia ma tausia a’o vevesi ai aulotu eseese i Samoa i le tapenaina o tala ma tauloto a le fanau mo le lotu tamaiti.
O le Aso Sa muamua o le masina nei o Oketopa na afea ai le nofoaga o fanau sauaina i Tuanaimato e A’oa’o ma o latou faletua o le tausaga tolu i Malua, ma faagasolo ai se latou polokalame faaleagaga e fesoasoani i fanau ua sauaina ina ia maua ai se lagona filemu mai mafatiaga o le mafaufau ma le tino i sauaga sa faia e nisi o o latou aiga ma nisi tagata ia i latou.
O le mafuta atu o A’oa’o ma faletua na faaalia e le Toomaga na amata i le tausaga e 2011 ma o loo faaauau pea, peitai mo le tausaga nei ua fuafua tonu le polokalame i le taimi ua tapena le atunuu i le Aso Sa o le Lotu a Tamaiti. O polokalame foi ia a le kolisi faafaifeau e fesoasoani e faatupu ai lagona fiafia ma le loto talitonu o fanau e mafai ona toe faafouina o latou olaga aemaise io latou lagona mafatia ona o sauaga o le tino ma le mafaufau. O fanau o loo tausia e le Toomaga o loo aofia ai i latou e iai manaoga tumau o le tino. Sa aofia i latou i polokalame a le vasega tausaga tolu o le kolisi faafaifeau i Malua. Na faaalia e le Peresitene o le Toomaga susuga Siliniu Muliagatele Lina Lo Tam Chang, o lona agaga faafetai i le Pule o Malua le susuga Maafala Lima ona e lē o motusia le latou mafutaga soofaatasi.
“E lē o uma le asiasi mai pea o nai A’oa’o ma o latou faletua aemaise o nai faafeagaiga o loo galulue i le kolisi, ma o se lagona sili lea ona ootia ai a’u nei ona ua mafai i le mafutaga ona lagona ai e fanau sauaina le mafanafana o le alofa o le Atua ia i latou”.
Na faaiuina le polokalame i se taumafataga na saunia e faletua o le vasega tausaga tolu a le Kolisi faafaifeau i Malua na tausasami ma aai faatasi ai ma nai fanau o loo i totonu o le Toomaga mo ē Puapuagatia.
