E lei ‘alo le Palemia i le tuusa’o o sona finagalo le fiafia i tapenaga o le aulakapi taitoafitu ei lalo o le 18 tausaga mo taaloga a le Olimipeka mo Tupulaga Talavou o loo faagasolo nei i Europa. Na afea e le ‘au le fono a le Palemene i le aso Faraile ua mavae mo se upu faalaeiau a le Malo ma le Palemene ao lei malaga e se ma Samoa i le aso lava lea.
Na momoli faamanuiaga a le Palemia i le ‘au atoa ae taotaotua i lona finagalo sa ia faailoa ai ua le faalua faatolu ae ua fai soo le faiaga ma le pipi’o o ta’ita’i taaloga a le atunuu i le tuai ona tapena o vaega e manaomia mo tagata taaalo. Na faaalia e Tuilaepa o le o le aso Tofi na faatoa oo atu ai le talosaga i le Malo mo se fesoasoani, ae aso Faraile malaga ese le ‘au.
“Aisea ua tupu soo ai lea tulaga, e iloa ai le faatamala tele o outou o loo faauluulu iai taaloga, o lea na faatoa fai anapo le faaiuga aisea ?”. Na alu motu foi le finagalo o le Palemia i taitai o taaloga ina ia filifili na o tagata e agavaa ma tatau ona malaga ae le o le o ai ma tagata e leai se agavaa. Na faailoa foi e le Palemia e iai lava tulaga a filifili tagata e malaga ona fili lea e avea ma faiaoga ae leai se silafia o se taaloga. Na faailoa foi e le palemia e tatau ona maua ni pine a Samoa i ia taaloga ma ia maua ni pine auro. “Ua masani tatou i faamatalaga o le faapea o taaloga ia e aogā e faamasani ai tatou, ae ua lē o toe aogā ona faamasani pea ae ua tatau ona filiga ma saili se ‘ai mo le tapuaiga a le atunuu”.
I le taligamalo a le atunuu i taaloga a le Pasefika i le tausaga fou, na faaalia e le palemia e talu lava ona talimalo Samoa i nei taaloga faavaomalo e lei maua lava se sili poo le tulaga muamua i pine e maua. Ua na o le taligamalo i taaloga o le 2007 na tulaga lua. “O le mea ua tatau ona iai le tatou autaalo i taaloga ia o le tausaga fou e tatau ona maua se afe o tagata taaalo”.
E 300 afe tala le meaalofa tupe a le Malo mo le autaaalo a Samoa i taaloga olimipeka a tupulaga talavou. E toatolu le aufusu a Samoa ma le aulakapi taitoafitu ei lalo o le 18 tausaga le matutua.
O le lu’i a le palemia e tatau ona agavaa uma le autaaalo ua fai ma sui o le atunuu ise autaalo a Samoa i taaloga a le Pasefika o le 2018.
