E leai se atunuu o le Pasefika e pei o Samoa e lē o naunau e atiina a’e tulisi poo tagata tafafao auā o le isi lea ivitu o tupe maua e tafe i le atiina a’e o le tamaoaiga. Peitai e le faapea e na’o na naunau e faatosina tulisi mai isi atunuu e tafafao ma eva i se atunuu ma faaaogā ai auaunaga e pei o faletalimalo, o fale’aiga ma matafaga lauoneone ae e ao foi ona mataitu ma tapena i aafiaga o atunuu i o latou siosiomaga e pei o gataifale, ma le vaomatua mai le faaleagaina i gaioiga e fesootai ma lea atina’e tāua tele.
O le faalapotopotoga o le siosiomaga o le Pasefika o loo i Samoa lona nofoaga tutotonu e feagai ana galuega faatino ma polokalame e puipuia ai siosiomaga o atunuu e lē gata o le laueleele ma le sami ae faapea foi i le ea.
O Samoa sa talimalo i le vaiaso ua mavae i fonotaga o lenei atina’e sa faatalatalanoa ai mataupu tāua mo le siitia o tagata tafafao i atunuu o le Pasefika, ae sa lotolotoi ai ma mataupu e fesootai ma le siosiomaga ina ia mautinoa e malupuipuia le siomiaga faalenatura o atunuu, ae ia mautinoa ai le faatumauina pea o le atina’e o tagata tafafao poo le sustainable tourism.
Na faaalia e le afioga i le Palemia susuga Tuilaepa L Sailele Malielegaoi i lana saunoaga na tatala ai le fono a Minisita o tulisi o le Pasefika sa taualuga iai fonotaga na amata i le Aso Lua, e tāua le atina’e lenei ae e tāua foi le mataala i le puipui malu o le Pasefika lanumoana le Blue Pacific ose autu sa faatāua e taitai o Malo o le Pasefika i lana fonotaga sa talimalo ai Samoa i le tausaga e 2017.
O le Pasefika o loo pulea se vaega tele o ogasami o loo fagotaina ai le tuna poo i’a o le atu ma a le vaavaaia lelei e ono aliali mai i ni tausaga oi luma ni faafitauli e aafia ai le maua pea o lea alamanuia. I le fesootaiga ma le atina’e o tagata tafafao e tāua ai le mataitu o auala e atina’e ai le tulisi ina ia lē afaina ai ma alaga’oa o le gataifale o loo faalagolago iai tagata o le Pasefika i le itu i taumafa ma tupe o loo maua ai.
