O le aufili a Samoa lea e agai i Ausetalia mo le Taamilosaga o le Ipu o le Lalolagi o lenei tausaga ua leai ma se sui mai i Samoa nei ua filifilia ai.
O le ‘au a Samoa lea na ave ma manumalo i le pine apamemea o Taaloga o le Pasefika i Port Moresby Papua Niu Kini o le ‘au lava foi lea e foliga mai o le a fai ma sui o Samoa i taaloga nei o le Ipu o le Lalolagi auā e leai foi se tasi o tamaitai mai i Samoa nei na taalo i le aufili lea na ave i taaloga o le Pasefika.
O le taimi lenei o loo tulaga 13 le auneitpolo a Samoa i le faatulagaga o ‘au a le lalolagi i lenei taaloga ma o le taumafaiga e pei ona ta‘ua e le Pulega o le Asosi Netipolo a Samoa, o le unai ina ia maualuga se alu i luga a le ‘au a le atunuu i lea tausinioga faavaomalo.
O le faamatalaga a le tamaitai faiaoga o le ‘au a Samoa, e faigata tele le tau faamaopoopoina o le ‘au a le atunuu i le salalau ai o tamaitai i Ausetalia faapea ai ma Niu Sila ae o le taaloga muamua foi a le ‘au e lē faigofie i le pulu o loo iai nei lea e fetaui ai ma le ‘au a Jamaica i le taaloga muamua lava o lea taamilosaga.
O le Aso Lulu o le vaiaso lenei e taunuu ai le ‘au a Samoa i Sini Ausetalia auā lana uluai taaloga lea. O le ‘au a Samoa ua aofia i ‘au e lima ua fesoasoani le Malo o Ausetalia e avatu ma totogi le tausinio ai i le taamilosaga tele lenei o le Ipu o le Lalolagi.
O nei ‘au na filifili lava e Ausetalia e fesoasoani i ai ona o le manatu e telē le avanoa e maualuga ai a latou taumafaiga i lenei taaloga ae peitai e lē o lava le tupe e faatupe ai le malaga atu ma tausinio. O Samoa la le ‘au e tasi a le Pasefika o loo faatupe i lalo o lenei fesoasoani.
Faaalia e le Komesina o le malo o Ausetalia i Samoa nei, o le unai a le malo o Ausetalia i le talimalo ai i nei taaloga a le lalolagi, o le taumafai lea e lagolago i tamaitai ona o le isi taaloga lea ua iloga le toatele o tamaitai ua taaalo ai ma o se auala lelei tele lea i le vaai a Ausetalia i le faamalosia o le tulaga o tamaitai aemaise i le itu tau i atinae o taaloga.
O loo faagasolo lava taaloga a kalapu i Samoa mo le taaloga o le netipolo ae na ta‘ua e le tamaitai faiaoga ia Marcia Hardcastle o loo manunu‘a nisi o tamaitai lelei o lenei ‘au e aofia ai tamaitai e toalua o loo faasoa i le tofi kapeteni, ma o loo iai foi nisi na manunu‘a mai i taaloga o le Pasefika ae o loo maualuga le manatu o lenei tamaitai i le lelei atu o taumafaiga a le ‘au a Samoa i taaloga o le Ipu o le Lalolagi.
O le Aso Faraile nei le taaloga muamua lea a Samoa ma le ‘au a Jamaica.
