E toasefululima sui tauva na sailia le siamupini o le Mounties Got Talent 2015 i le Aso Tofi talu ai lea na filo ai ma le alo o Samoa is Oberta Filoa.
O lenei tauvaga ua vaaia le faatupulaia o le mataina o taleni a sui tauva i tausaga taitasi ae o le siitia foi o faailoga tupe i lenei tausaga. E valu vaiaso o faatautaia ma o le sailiga siamupini na filo ai lava ma lenei alo talavou o le atunuu.
O le pese sa ia usuina o se pese uigaese toe faigata lona fati ma le maualuga o fegauiaiga o siuleo. Na aualofa ai lenei alo o Samoa i le tuaa o lona tina ua faiilagi lana folauga i nai vaiaso ua tuanai atu, le tamā matua ia Faavaemalo Keresoma Si‘a Alao e fitusefuluiva tausaga o lona soifua ae maliu. O se pese ua lauiloa i le lalolagi atoa ‘Dance with my Father Again’ a Luther Vandross.
O le taimi na oo ai le faasologa ia Oberta Filoa na faalauiloa mai e le alii papalagi na avea ma siufofoga o le po, o se taimi muamua lea ua tauva ai Filoa i se tauvaga faapenei.
Ae peitai sa lei talitonu le aofia i le savali mai o ia i luga mo lana pese ma lana kitara faaopoopo i ai ma lona leo malie o se taimi muamua lea ua pese ai i se tauvaga faapenei.
Pe tusa ma le onoselau tagata o atunuu eseese na maimoaina lenei sailiga siamupini lea sa auai ai fanau e tupuga mai Asia, Aferika, Europa ma Ausetalia nei. I le taimi na amata ai le pese a Oberta na pati ma po le aofia i le matagofie o lona siufofoga ma lana kitara ma pipii ai loa ma lona suafa i le lima pito i luga.
E ui ina tulua ae manumalo se tamaitai Filipaina ia Sophie Bridget Dalisay i lana pese faaopera i lea po, ae mautinoa le toatele e leai se eseesega ma le siufofoga mataina o Filoa.
Sa masii uma atu ona aiga ma uo mo le tapuaia o lona alofaiva e aofia ai si tina o lona tina ia Lotomau aemaise lona tina ia Moemalo Filoa mai le afioaga o Vaovai Falealili.
O le tamā o le alii o Oberta Filoa o le susuga lea ia Faafouina Fouvale Filoa mai Saleaumua, Aleipata lea sa lauiloa i le faaili a le ‘Faatalatalasemataeemo’.
E $2,000 le faailoga tupe na ia mauina i le tulua ae o le manumalo na sola ma le $5,000, tulaga tolu e $1,000. Na momoli foi le faafetai tele a lenei siufofoga matagofie mo le lagolago a nai ona mātua, aiga uo ma ē masani ae faasilisili ai le Atua.
