Na atofaina o le uluai taimi lea ua faia ai se aso faapitoa o tu ma aganuu a atumotu o le Pasefika e aofia ai Fiti, Tonga, Papua, Solomona, Kilipati, Tuvalu, faapea Samoa, e pei ona alo atu i ai i le po o le Aso Toonai na tea nei, 1 o Aukuso.
Na matuai vaaia le lolofi atu o le mamalu o le atunuu i mātua ma aiga e lagolago le aso faapitoa a le Iunivesete a le UQ (University of Queensland), ma e maeu foi le uigaese o lona faatinoina e tautai o le faamoemoe.
E faafoliga o se faigamalaga a se vaalele a taunuu i lea atumotu ona faafeiloaia lea e ausiva faapitoa, na sioa le aumaimoa i le mae‘ae‘a o tapenaga a le asosi a tamaiti Pasefika e faamalieina ai tagata uma.
Sa valaaulia le autalavou EFKS Southwest Brisbane e faatino ni faafiafiaga e pei ona faatasi atu ai foi le faifeau toeaina faatonu ia Rev Tauaaga ma le faletua ia Senerita Mataafa ma le paia i le ekalesia ma nisi lava o faafeagaiga sa vaaia le lagolago i le faamoemoe.
O le tamaitai o Ipiniu Mataafa o le Peresetene lea o le sosaiete a tamaiti Pasefika o a‘otauina i le UQ i St Lucia ma o se fiafiaga sili foi lea i le Ekalesia EFKS aemaise le Matagaluega a Saute ona o taumafaiga ma tulaga lelei o alo ma fanau i lea foi Iunivesite.
Sa valaaulia foi le sosaiete a tamaiti Pasefika a le Iuniveste a le QUT.
