E lei iai se afaina o le tauvaga tautalaga a fanau aoga i aso e lua o le tatalaina o le tauvaga a le ASB Polyfest i lenei tausaga lea sa amataina i le Aso Lulu ma le Aso Tofi, auā sa mae’a lelei ma faataunuuina ma le manuia lea vaega o le faamoemoe o le ASB Polyfest i lenei tausaga ma sa manino ai foi aoga sa lautogia ma maua tulaga.
Peitai e lei mafaufauina se faalavelave e ono tulai mai i Chirstchurch i le Aso Faraile o le vaiaso ua mavae a’o faagasolo ma faaauauina polokalame o le ASB Polyfest i Manukau e pei ona iai le aso lona tolu o le faamoemoe i le Aso Faraile lea na amata faagasolo ai loa tauvaga o faafiafiaga a aoga taitasi e ala ia latou pese, mauluulu, sasa ma le taualuga.
I le itu a Samoa e 19 aoga tuufaatasi a tama ma teine na faafiafia i le Aso Faraile ma na molimauina ai le maoae o tapenaga a fanau aoga ma faiaoga aemaise o le lagolago a mātua i le finauina lea o le tauvaga i lenei tausaga poo ai o le a sola ma le siamupini. Ua lē gata i le faatumulia o fanau aoga ae ua oo lava i mātua ma ekalesia ma kamupani ua tumutumu atu i Manukau ma molimauina le polokalame a le ASB Polyfest aemaise ai o faleaiga a ekalesia ma aiga ae faapea foi i oloa a kamupani sa faatauina ai.
O le Aso Toonai na tuu e faamae’a ai polokalame o le ASB Polyfest e ala lea i faafiafiaga a aoga na’o tama ma aoga na’o teine, ma tapunia aloaia ai loa le faamoemoe o lenei tausaga. Talu ai ona o le tulai mai o le faalavelave i Christchurch i le aoauli o le Aso Faraile, na a’e ai loa se manatu i le taitaifono ma le komiti faafoe o le ASB Polyfest e tatau ona faamutalia ma faamae’aina polokalame o le Polyfest i le Aso Faraile, ona o se lagona i le komiti faafoe e tatau ona malupuipuia fanau aoga o loo auai i le Polyfest mai faalavelave tutupu e pei ona tulai mai i Kalaiesetete. Ma e sili lava le puipuia nai lo le togafitia, ma o se filifiliga ma se faaiuga talefeagai lelei lea mo le saogalemu o aiga ma fanau aemaise o le ola soifua maloloina lelei o tagata lautele.
I aoga na tapena mai i le Aso Toonai e faafiafia, na uma ona momoli i ai le agaga faafetai a le komiti Samoa filifilia a le ASB Polyfest e ala ia latou sauniuniga i le tauvaga i lenei tausaga, ae ua ave foi i ai ma le tuualalo ma le faamaliega a le komiti e faapea e sili le faamuta ai ii le tauvaga, mo le saogalemu o le fanau, nai lo le naunau e faaauau polokalame ae toe tulai mai ai se isi faalavelave.
O le vaavaai mamao a le komiti e sili ai le onosai o fanau i lenei tausaga, ae se’i aulia le tausaga fou i le alofa ma le agalelei o le Atua e toe taitai atu i ai lo latou soifua ma le ola ona toe faaauauina ai lea o le faamoemoe.
Ua momoli foi le agaga faafetai o le komiti i aoga ia sa tauva i le Aso Faraile, ae ua taoto ai faapea ua faamuta ai ii le tauvaga, ua leai ni faailoga. Ua tutusa uma le iuga ua iai aoga sa tauva, i le Aso Faraile ma aoga na tuu e faafiafia i le Aso Toonai, ona o le agaga maualuga i le komiti ia taga tutusa uma le faaiuga i aoga sa faafiafia ma aoga sa lē faafiafia.
E ui i le faigata na talia e nai fanau aoga na tuu e faafiafia i le Aso Toonai, le faaiuga a le komiti ae sa toe lagona lava le tāua o le tuualalo a le komti auā le saogalemu o fanau ma aiga. Ma ua taoto mai ai ii le iuga o le tauvaga i lenei tausaga ua leai se laugatogi ae ua tutusa uma le manumalo o aoga sa faafiafia i le Aso Faraile ma le Aso Toonai.
Ma o loo lagona uma e faiaoga ma fanau aemaise o mātua le lagona o le fiafia ona o lea faaiuga lelei ua taoto mai i ai le iuga o le ASB Polyfest i lenei tausaga.
