E tatala lava polokalame a le ASB Polyfest a fanau aoga i tausaga taitasi i tauvaga tautalaga a fanau aoga, mai le Vasega 9 e oo atu i le Vasega 13. Ma o le tausaga nei ua maitauina ai le tele o le suiga ma le agai pea i luma o tauvaga a le fanau e ala ia latou tapenaga i tautalaga saunia ma tautalaga e lē saunia e pei ona masani ai tausaga taitasi.
O le Aso Lulu na tatala ai le faamoemoe o le ASB Polyfest i lenei tausaga, i tauvaga tautalaga a le fanau mai le Vasega 9, lea e toafitu i latou sa tauva ai; o le Vasega 10 e toaiva le fanau na auai i le tauvaga, ma le Vasega 11 e 11 sui tauva.
I le aso lona lua o le Aso Tofi lea na faataunuuina ai le tauvaga a fanau aoga mai le Vasega 12 lea e 15 fanau sa auai, ae mulimuli ai i le tauvaga a le Vasega 13 e 17 sa tauva ai faatasi ai ma le tauvaga o tautalaga lē saunia lea e toaiva na auai, ma o le tauvaga lea faatoa tapena lava le tamaitiiti i luga o le malae ina ua ia taulimaina le autū e talanoa ai.
O le suiga tele i le tauvaga tautalaga a le fanau i lenei tausaga ona ua fai si toatele o aoga maualuluga ma kolisi taitasi o lea ua latou faatāuaina lea tauvaga, ona o le sailiili lea i le faatāuaina o le gagana ma le aganuu a Samoa, aemaise ai o le faaaloalo.
E pei ona ta’ua e le afioga i le faletua ia Vini Afutoto Lale Peteru o se tasi o faamasino i le faamoemoe o le ASB Polyfest i tausaga taitasi, na ia ta’ua ai ua telē le suiga o le tauvaga tautalaga i lenei tausaga e ala i le gagana, aemaise lava i le faaleoina o upu ina ia sa’o lelei le ta’uina o upu.
Ma o le tausaga foi lenei i le tauaofaiga o le tauvaga tautalaga e ese le manaia o le saunoa a le fanau, e faatusatusa lea i alo ma fanau na fananau i atunuu nei, auā a fua i ai e lē faigofie le tautala o le tamaitiiti i le gagana Samoa e ala lea i le faaleoina o upu Samoa. Se tasi o suiga tele i lenei tausaga, o le faatulagaina lea o le tautalaga a fanau mai le amataina, o le ogatotonu o le tautalaga seia oo lava i lona faaiuga, ua manino lelei ma maioio lona faataotoga.
E toaitiiti nai fanau sa lē sa’o le faaleoina o nisi o upu, ae o le aotelega o le faamoemoe o le tautalaga e momoli ai le faamalo i le manaia o le tapenaga a nai fanau sa tauva. O autū na fai agai iai tautalaga, sa tele lava ina faatatau i le lumanai o fanau, i le ola aoaoina i se lumanai manuia o fanau, sa tele lava ina tu’i mai i tautalaga le toaga i le aoga, faamaoni i le aoga, aisea? Auā se lumanai manuia.
E lē o se Tauvaga Lauga o le Tauvaga Tautalaga
Na faamanino lelei i aoga taitasi ma fanau sa tauva, o le faamoemoe maualuga o le tauvaga, o le tautalaga ae lē o se lauga. Pei lava ona toe faamanino mai lea vaega, o le tautalaga e ese lona faiga o le leo, ma e tautala sao foi i le faatalofa i le mamalu o le aofia ua auai i lea aso ona talanoa loa lea i le autu filifilia o le tautalaga, ma le lagona o loo i le tama ma le teine aoga e malamalama ai lava ia, ae o le lauga e iai foi le suiga o lona leo, ua leo mai i le lauga faamatai, ae ua ta’ua ai foi paia o le aso.
O le eseesega lea o le lauga ma le tautalaga auā o lea sa maitauina foi e susuga i faamasino le tauvaga i lenei tausaga ua oo lava i fanau teine sa tauva ua leo mai i leo o matai lauga aemaise o le faaaogāina o upu e ta’ua ai le k ma le t, leai e lē o le lauga faamatai ae o le tautalaga.
E ui i nai vaega itiiti na toe faaamanatu i nai fanau, ae na momoli le agaga faafetai tele o susuga i faamasino i nai fanau sa tapenaina a latou tautalaga i lenei tausaga aemaise o le faafetai i mātua i le lagolago malosi i faiaoga e unaia le faatāuaina o le gagana Samoa i totonu o aoga ma aiga, pei ona saunoa iai le afioga ia Fuimaono Tuiloma Alolua, o se tasi o faamasino i le tauvaga tautalaga.
O le ofisa o aoga sa nafa ma le lagolagoina o le tauvaga tautalaga a fanau i lenei tausaga, ma o latou foi sa tapenaina autū sa tatai iai lagona o le fanau, ae o le faalapotopotoga o le Fotu o Malama sa faafoeina.
O faamasino sa aofia ai le afioga i le faletua ia Vini Afutoto Lale Peteru, Afioga ia Muliagatele Vavao Fetui, afioga ia Tofilau Siliva Gaugatao, afioga ia Fuimaono Tuiloma Alolua ma le sui mai le ofisa o aoga ia Angie Enoka.
O le susuga i le faafeagaiga ia Rev Filemoni Tuigamala mai le EFKS i Ranui na ia taitaiina sauniga lotu e tatala ai tauvaga tautalaga i aso e lua, ae o le faletua ia Alaimalo Sarah Vaega sa fai ma fofoga o le aso.
Iuga o le Tauvaga Tautalaga
Vasega 9
Penelope Tanuvasa – Sir Edmund Hillary Collegiate
Lagimaina Tulaga – Otahuhu College
Tasman Lemoa – Mangere College
Vasega 10
Alosina Moeaia Toleafoa – Mangere College
Junior Sula – Sir Edmund Hillary Collegiate
Ioapo Tua Tevaga – Tangaroa College
Vasega 11
Seilala Tupe – Waitakere College
Eliana Filifilia – Mangere College
Iosefatu Leiataua – James Cook High School
Vasega 12
Devontay Tema – Onehunga College
Joshua James Gaina – Avondale College
Faafetai Junior Filoa – Kelston Boys High School
Vasega 13
David Faalau Solia – Sacred Heart College
Faailuga Leuluai – Mangere College
Senerita Petelo Auvele – Kelston Girls College
Tauvaga Tautalaga lē Saunia
Ainuu Nansen – James Cook High School
Faamasino Tariu – Kelston Boys
Alofa Magele – Sir Edmund Hillary Collegiate
