Ua ilitata se finagalo o le afioga Peseta Vaifou Tevaga i le aliali pea i lipoti o le manumalo o lana kamupani o le Aldan i le suaina o le malae vaalele fou i Ti’avea

Ua ilitata se finagalo o le afioga Peseta Vaifou Tevaga i le aliali pea i lipoti o le manumalo o lana kamupani o le Aldan i le suaina o le malae vaalele fou i Ti’avea

“A tou o e fesili i le Komesina o faigapalota e leai ma se aiaiga e taofia ai faipule ona fai ni pisinisi”. O le finagalo lea o le Minisita Lagolago o le Matagaluega a le Palemia ma le Kapeneta le afioga Peseta Vaifou Tevaga e faamatala ai sona lagona lagomia, i le agiga pea o lipoti ua fesiligia ai sona aafiaga poo se conflict of interest i le manumalo o lana kamupani o le ALDAN i le galuega o le suaina o le eleele mo le fausia o le malae vaalele fou i Ti’avea Aleipata.

“Ua 28 nei tausaga o fai la’u kamupani ma na amata ou te lei faipule”.

Na faaalia e Peseta o loo ia umia le 50 pasene o sea o le kamupani a lona aiga, ao isi sea o loo umia e lona faletua ma ona atalii e toalua. “O lo’u atalii na faia uma feuiuiaiga o le tuuina atu o le ofo mo le galuega ae e lē o o a’u o alu ai”.

Na valaau e Peseta ni tusitala sinia se toatolu mo se faatalanoaga e faamanino mai ai lona finagalo i le mataupu ma ia toe faailoa ai galuega ua faia e lana kamupani. O ni galuega tetele na faaalia e le Palemia susuga Tuilaepa L Sailele Malielegaoi i le feiloaiga masani ma tusitala i le Aso Tofi ua mavae sa lelei ona faatino e le kamupani a Peseta.

“Tou te silafia le taulaga i Salelologa o le kamupani lea na suaina le maa ma le soata o le laufanua, na gaugau nisi o masini a le kamupani, ae o se galuega na lelei ona faia”. O le fesiligia o le Palemia e mafua i le tuuina atu o le galuega o le malae vaalele i Ti’avea i le kamupani a lana Minisita lagolago. Sa faamanino e Tuilaepa o loo iai taiala mo Minisita o le Kapeneta i le ave o a latou pisinisi e faagaioia e a latou fanau ma tagata o aiga, ae agai sa’o o latou tiute i le faia o galuega a le Malo e manuia ai tagata uma o le atunuu.

O se tasi o galuega tele na faamatala Peseta sa fai e lana kamupani o le aveesea o le vaa la’upasese o le Salamasina na pa’ulia i gatai o le eleele fou ina ua mae’a le afā malosi o Ofa i le tausaga e 1990. O le vaitau lea ua toe taliu mai Peseta ma lona aiga mai Amerika sa aumau ai ma galue i le tomai o le uelo uamea. O le tomai aoaoina lea o le Minisita lagolago sa mafua ai ona naunau e faatu se kamupani e faia ia ituaiga o galuega.

Ua faaalia e Peseta e lē o toe iai sona aafiaga i le faagaioia o le pisinisi, peitai na ia ta’ua foi o soo se tagata lava o avea ma faipule o le Palemene, o isi ia ona tiute o le saili o seleni mo le atinae o le aiga. “Ou te lē ma e faailoa atu e faitau miliona aitalafu a a’u nei ma lo’u aiga i faletupe, ma o le isi lea o’u tiute o le tamā o le aiga o le saili o galuega e maua ai seleni e tausi ai le aiga ma totogi aitalafu”.