Na gata le tatou Vaega muamua, i le taimi na tatala mai ai lagona o Alatise i fafo ane o le potu faamasino, i Mulinuu ia Setema 2018. I lana tala “Ae ua lagona lava le vaivai o ota tino ma lagona ona ou te lē gafatia lava ona ou toe ola i totonu o le falepuipui. Ma sa ese ai lava laasaga na oo iai o’u lagona i le aso lenei.”
O le atuatuvale ai o lagona o Alatise, afua ona o le tagi na faia faasaga ia te ia, lea ua toe tulai ai i le faamasinoga maualuga mo le taimi muamua talu ona magalo i tua i le paloloa ia Setema 2010. O le taimi a’o avetaavale i le loli kiliva pia mo le kamupani na faataua le Vailima i Savaii, lea na faatau faasolitulafono ai e le au la’uoloa, pusa Vailima i se faleoloa i Salelologa.
O le faamatalaga a Alatise i le Tusitala, o le aso lava lenei na ou sau ai, ma lo’u manatu a faapea o le ā se faaiuga a le faamasinoga, ae toe ave a’u i le falepuipui ua gata ai foi iina ma a’u.” I le maitau a le Tusitala, e lei taumamao lava lagona o le pule i le ola ma ia Alatise talu mai le po na sauni ai e sau i Upolu i lona faamasinoga e oo lava i le taimi na tulai ai i luma o le faamasinoga. Ae na faatoa maua lava lona mapusaga ina ua faapea ane le faamasino, o le a toe valaau lana mataupu i le aso valu o Oketopa e toe oo mai ai i le faamasinoga.
Na oo i le taeao o le aso valu o Oketopa 2018 , e lei taina le 10, ae ua leva ona faatalitali Alatise i nofoa i fafo ane o le faitotoa o le potu faamasino o le faamasinoga maualuga, ina ia faamautinoa e alu i totonu i le taimi e tatau ai. Ua amata ona lau mataupu o lea taeao, ma tamua lava i tagata sa nofo taofia i le faaiuga o le vaiaso, ma faasolosolo lava ina gaogao atu le potu faamasino o lana Afioga i le Faamasino Sili, Chief Justice Patu Tiavaasue Falefatu Sapolu.
Toatele alii talavou na molia atu i le umia o sikaleti taai mariuana ma laulaau. E filo atu ai ma se alii tino laititi lava, na ioe i lona moliaga o le talepe fale i Vaitele, ae tetee i lona moliaga o le gaoiga o meatotino a le aiga e ana le fale na ia talepea. Na tetee lea alii tino laititi i lona moliaga o le gaoi, i lana finau, “ua uma na toe faafoi mea.” Peitai na saunoa Patu, o le gaoi lava le mea lena, ua e ioeina lou alu faamalosi i le fale, ma aveese mai mea a le aiga, o le gaoi lava, ma ua faamauina ai lau Ioe i le moliaga o le gaoi faatasi ai ma lau Ioe i lou moliaga o le talepe fale.
Na maitauina le fesili o le faamasino i tagata molia, pe mananao e fai se loia, ma o le toatele lava na faapea ane e leai. Peitai e leai se fesili faapea na faia ia Alatise ma le tasi alii talavou na la tulai faatasi i totonu o le pa. Ae ua na’o na fautuaina e le afioga i le Faamasino Sili, afai e iai ni a la molimau, ia latou oo ane i le aso o le faamasinoga. Lea ua tuu atu i le aso 4 ma le aso 5 o le masina o Mati o le tausaga fou 2019.
Ua toe foi Alatise i Savaii ma le fiafia, ae ua atili ai ona faanoanoa ona e foliga mai ua mautu le aso o lona faamasinoga, ae leai sana loia, ae lē o fesili ane foi le faamasino ia te ia pe fia fai sana loia pe leai. “O le mea lea ou te lē iloa pe aisea ua lē fesili mai ai le faamasino ia te au pe fia fai sa’u loia. Auā e tatau ona fai sa’u loia, ae ou te lē o malamalama pe faapefea ona fai sa’u loia, ae leai se tupe e totogi ai. Ae ou te manao lava e fai se loia.”
Ua amata ona matalatala mai isi apa anufe o loo nofo ma Alatise. E lē o ni tamai anufe foi, ae faatatau lava i le mataupu lenei ua molia mai ai o ia. “Na ou fesili i le isi auvaega lea na molia faatasi matou pe aisea na lē omai ai i le valaauga o le matou mataupu, ae faapea mai, ua fai atu le leoleo e aua le popole e leai se mea e faia ae faitalia ia.” O le tala foi lena a le leoleo lava lea na fai mai ia te au ma lo’u toalua. Fai mai, “aua le popole e leai se case e faitalia lava ia ma fix.”
Ae o tua o lena faitalia a le leoleo ma fix, o le alu atu ma ao mai tupe i le tamai faleoloa, pei se potu moe, o le toalua o Alatise. O le tamai faleoloa lea ua tuua’ia ai Alatise faapea o tupe gaoi na faatupe ai, “ae leai, o le loan o tamai pisinisi.” Na talanoa Alatise e lē na’o lona toalua na alu iai le leoleo lea ma ao ao tupe mai ai, na molimau atu foi e isi lava tagata e iloa lelei lava e le leoleo lea, le alu aisi tupe ai, ae pasese lava i le “aua le popole e leai se case.”
Peitai na ta’ua e Alatise i le Tusitala, “o le taufaavalea le mea a le leoleo lea na fai, ou te lei valea ai. Na ou tuu alu lava a’u i Tuasivi ma Apia e siaki poo afea e fai ai le faamasinoga lenei, ona ou te manao lava ia faaali le mea moni na tupu. E mamafa tele ia te au le vaai a tagata ia te au, faapea o a’u o se tagata leaga, ae leai.
O le leoleo lea na ia faia le taufaavalea, ua ou te’i i le isi aso ua sau momoli mai le faila o tagata uma lava na molimau faasaga ia te au, ma faatonu a’u ou te alu e ave le faila lea o molimau i le alii ????? ….
O le a sosoo atu le vaega lea o le tusitusiga i le lomiga i le vaiaso fou. Ae silasila ane i le faaauauina o le tala i le mafutaga a Alatise ma lona faletua ia Terry.
