Ua lē toe manuia le taumafai atu o le sui o Samoa le susuga Nanai Su‘a Tanielu Su‘a i le faaauauina o lona tofiga o le Faatonu aoao o le ofisa tutotonu o faigafaiva a le Pasefika i le ofisa autu i Honiara le laumua o le Atu Solomona, ina ua mae‘a ona faia le faaiuga mo lea tulaga maualuga. Ua filifilia nei se tasi mai le atunuu o FSM le Federated States of Micronesia o ia lea o James Movick.
O le susuga Nanai Su‘a Tanielu ua iva tausaga o ia tauaveina le tulaga faatonu aoao le Director General o lea ofisa tāua o malo o le Pasefika, o loo feagai ma le faamalosia o tulafono tau faigafaiva ma le unaia o polokalame mo lea atina‘e tāua.
O le filifilia o le alii mai le FSM, i atunuu Maikoronisia ua faaalia, o se taimi muamua lea ua pale ai se tasi mai atunuu e valu o loo i totonu o le lio o malo na sainia se maliega tau faigafaiva i le tausaga e 2010 i Majuro le laumua o le Atu Malesala e ta‘ua o le Parties to the Nauru Agreement Bloc.
Ua faaalia o se maliega o le a molimauina ai ni suiga tetele i le atinae o le fagotaina o le tuna poo le atu lea e iai ma apakoa ma isi i‘a o lea ituaiga.
O le toe sailia o se faatonu aoao o le ofisa tutotonu o mataupu tau faigafaiva a le Pasefika, na tulai mai ai se vevesi ina ua fesiligia e nisi o atunuu na talosaga o latou sui, le lē aofia o ni sui se toalima i le faatalanoaga poo le interview mai le toasefulu na faamautu e faatalatalanoa.
O le fono i Tonga i le amataga o le masina nei na faamaonia ai le tofia o le faatonu aoao fou ua filifilia.
