E tolu fogafale o se fale o le kamupani a le PNN Pacific, o lea ua amata nei ona galuega e fausia ai i Saleufi, e tusa ai ma lipoti mai e le nusipepa a le malo, le Savali.
I se faamatalaga a le faatonusili o loo faafoeina galuega a le kamupani, managing director Ms Mara Wilson, o loo iai le faamoemoega e tatau ona tatala lenei fale mo pisinisi o le a faatautaia ai i le isi 12 i le 18 masina o lumanai nei.
O lenei fale fou o le a aofia ai se supamaketi, o se faleoloa (department store), o se faleaiga, ma e ono faatulaga ai foi ma se fale e faatau atu ai masini faaeletise (electronics outlet).
O isi fuafuaga o loo iai e aofia ai se falefaamalositino (gym), se falekofe ma atonu e iai ma se bar.
O le a fausia ai foi ni lifi e feoai ai e ese mai faasitepu, e faatulaga foi faamalama mo le faaalialia mai o oloa, ma isi totoga uma faapena. O lenei galuega o le a fausia i se laufanua e itiiti ifo i le kuata eka lona telē, ua lē lava ai se avanoa mo paka o taavale, ma ua faatulaga ai le foloa muamua e fai ai le kapaka.
E tusa ma le $2 miliona tala o loo inivesi ai i lenei galuega tele, ma o le fuafuaga lea a le kamupani, ina ia ese mai se isi mea e inivesi ai latou tupe mai le tele o isi inivesi.
O le fanua lenei sa iai muamua le faleoloa o le aiga o Chan Chui, ae na faatau ese mai e le PNN Pacific ma ana paaga faapisinisi mai Papua Niu Kini i le 2009.
