Ausiva Katoliko Tuufaatasi 2019

Ausiva Katoliko Tuufaatasi 2019

Tusia: Leilua Jerry Uesele – Sini

O le taimi muamua lenei i le talafaasolopito i Sini o le a lē faataunuuina ai le faamanatuina o le tutoatasi o Samoa talu ai le Corona Virus. Talu mai lava le faavaeina o le uluai Fono Aoao a Tagata Samoa i NSW i le 1986 faatoa misi lea o se Tutoatasi.

O le masina o Iuni i le vaiaso lona lua faatoa tapena ai Sini i tausaga taitasi e talafeauga ma le aso Malolo o le Aso Fanau o le Tupu Tamaitai (Queens Birthday) lea e faamanatuina i Aso Gafua muamua o Iuni.

Se vaaiga i le Samoa Day 2019
Se vaaiga i le Samoa Day 2019

I tausaga uma e tolu lava aso e fiafia faatasi ai uma tagatanuu Samoa i Sini e amata atu i le Aso Sa muamua o Iuni o le Faigalotu o le Tutoatasi e afifio faatasi mai ai Ekalesia e sii le viiga ma le faaneetaga i le Atua mo le Saolotoga i le Malo o Samoa.

O lona lua o aso ua faaigoaina o le Samoa Day i le uluai Aso Gafua o Iuni lea e faatautaia ai fale’aiga ma faafiafiaga a ausiva eseese i le aso atoa e faamanatu ai sauniga e masani ai e faapei o polokalame i Mulinuu.

 Se tasi o aufaafiafia o le Samoa Day 2019
Se tasi o aufaafiafia o le Samoa Day 2019

Mai le 2015 e oo mai i le  2019 ua matuā vaaia le faatumulia o tagata auai i le afe ma afe.

E taualuga i tausaga uma fiafiaga o le Fu’a i Sini i le Aso Toonai lona lua o Iuni i le Independence Ball lea foi e saunoa aloaia ai Sui o le Malo o Samoa o loo faamautu i Ausetalia nei ma molimoli ai le Faafetai i le lagolago a tagata lautele faapea foi le tapenaga a le Komiti o le Fono.

O le ogaoga o le pepesi o le Corona Virus ua faailoa ai e le Fono le usitaia o Tulafono pasia e pupuia ai le soifua o tagata lautele aemaise nai o tatou tagata i lenei vaitau faigata, o le mafuaaga autu lea ua lē faataunuuina ai le faamanatuina o le Sisigafu’a faapea le Samoa Day.