Sui o le PWPBN na ausia faailoga 2020
Sui o le PWPBN na ausia faailoga 2020

Tusia: Leilua Jerry Uesele – Sini

O le masina nei na atoa ai le fa o tausaga talu ona faavaeina i totonu o Sini Ausetalia, le Pacific Women’s Professional Business Network mo tamaitai Pasefika o loo faauluulu i se alo o Samoa ia Donina Vaa.

I lana saunoaga autu i luma o le tusa ma le 150 sui valaaulia i le Holiday Inn i Parramatta, na ia faamalo ma toe unaia ai le tausinio ma le finafinau o tamaitai Pasefika io latou tofiga, galuega ma pisinisi o galulue ai mo lumanai manuia.

Sa tauaaoina ai foi se faailoga mo le Tina matua le susuga Taulapapa Alisa Peacock mo lana auaunaga i tagatanuu o Samoa ma le Pasefika i Sini i le silia ma le 30 tausaga.

Donina Vaa (Faatonu PWPBN) lona tolu mai le taumatau laei mūmū ma nisi o Sui taualoa
Donina Vaa (Faatonu PWPBN) lona tolu mai le taumatau laei mūmū ma nisi o Sui taualoa

Sa faailoa ai foi i lea po le amatalia o se poloketi ma le Ofisa o aoga NSW i totonu o aoga maualuluga e tolu mo le tapenaina, tuliloaina ma le faaaupegaina o tamaitai Pasefika talavou i o latou faasinomaga, taleni ma lumanai manuia.

Na tauaaoina ai foi faailoga eseese i vaega e fa mo galuega a Sui auai o le PWPBN, e pei o le aufai Pisinisi na manumalo ai Alisi Tutuila le Faatonu o le Aspire Indigenous. Tulaga lua ai Sharon Tuivaiese o le U’Neeq Heels.

Taulapapa Alisa Peacock ma ona aiga ma uo sa auai atu
Taulapapa Alisa Peacock ma ona aiga ma uo sa auai atu

O le faailoga o Tamaitai Taitai Pasefika na manumalo ai Dr Thelma Arieta Faasalele o le NSW NETS. Tulaga lua ai Jacynta Fuamatu o le Community Organised 350 org Australia.

O le Faailoga o Tamaitai Faiaoga Pasefika na tauaaoina ia Dr Katerina Teaiwa o le Associate  Professor Australian National University. Sosoo atu ai ma Betty Amotawa Hohepa le CLO o le Matagaluega o Aoga.

I le vaega o tamaitai talavou na manumalo ai Mele Falea’aka Tupouniua. O Youth React Young Women e aofia ai Akanesi Folau, Maria Katonibau, Samantha Nicol, Tia Parmeter.

Na matagofie saunoaga faaopoopo a le tamaitai o Giovanna Lever le Faatonu o le Sparrow Group o se faiaoga foi i le Iunivesite o Sini Sisifo ma le University of Technology Sydney.

Na taualuga saunoaga faalaeiau mai le tamaitai ia Menime Tanuvasa Lene o le Ofisa Vaifafo ma Fefaatauaiga o loo faauluulu i ai le Polokalame a le WHO e puipui mai le COVID-19 i Fiti. E fasefuluvalu tausaga o tautua lenei tamaitai i tagata lautele, na momoli mai i le video tuusa’o lana saunoaga a’o maimoa atu i ai aofia na auai i le po.