To’a 3 ua Loka e Leoleo i le lē Usitaia o le Vavao o loo Faia i Niu Sila

Leoleo o loo faia o latou tiute i le puipuiga o tagata mai le soona feoai solo
Leoleo o loo faia o latou tiute i le puipuiga o tagata mai le soona feoai solo

Tusia: Asiata Pio Vaoliko – Aukilani

O le mae’a ai o le ripoti faaopoopo a le Malo ma le Matagaluega o le Soifua Maloloina i le siitia ai o le numera o tagata ua aafia i le siama o le Coronavirus i le aoauli o le Aso Gafua 30 Mati 2020.

Na faailoa ai foi e le Komesina o le Matagaluega o Leoleo a Niu Sila, Mike Bush le lokaina ai e leoleo ma taofia i le aso ananafi o ni tagata se toatolu ona o le lē usitaia ma tausisia o tulafono o le vavao o loo feagai nei ma le atunuu.

Na faaalia e le alii Komesina e toalua la ua toe tatala i tua e aunoa ma se moliaga peitai a toe faia loa ona lokaina loa lea faafalepuipui mo se umi e oo atu i le 6 masina.

Ae o le isi toatasi o loo lokaina pea ona o nisi o mafuaaga sa aafia ai o ia i le tulafono muamua. Na ta’ua e Mike Bush o le to’a 3 lenei sa lokaina mai e leoleo ona o le maua soo o feofeoai solo i le auala e aunoa ma se mafuaaga tatau.

Ma sa lapataia muamua foi e leoleo ma tuu avanoa i ai peitai sa faaauau pea le masani a i latou nei. Na faailoa mai foi e le alii Komesina o leoleo e oo mai i le taimi nei, e tusa ma le 4200 le aofaiga o mataupu ua latou taulimaina nei, e uiga i aiga e ripoti atu foi e nisi aiga o loo lē usitaia le vavao ma le tapu o loo faia nei.

O se tasi o vaega ua lapatai mai le Matagaluega o Leoleo aemaise lava i le vaega o loo feagai ma le Pasefika Liaison Team. Ina ia taofia nei e aiga ma i latou o loo faatauina oloa e pei o ipu meaai ua faavelaina, taui‘a mo oka ma soo se taumafa lava e faaaogāina ai le FB.

Na faailoa mai e le susuga i le Malu o le Malo ia Siki Ah Shew ma o ia foi o le sui o le Matagaluega i le va ma tagata Samoa ma le Pasefika i Manukau. E lē gata o luga o le laueleele o loo mata’ituina e leoleo mo le siakiina o i latou e lē usitaia aulape ua faatulaga mai e le Malo mo le puipuia o le faama’i.

Ae ua oo foi i luga o upega tafailagi e pei o le FB, Twitter, FaceTime, WhatsApp ma soo se auala lava faaonaponei, ua siakiina foi e leoleo. Ma na ta’ua foi e le malu o le Malo, o loo silafia uma lava foi e le Matagaluega i latou o loo faia lea tulaga.

Na fesiligia foi le Matagaluega pe aisea ua faasāina ai lea tulaga ae o taumafa o se tasi lea o vaega pito sili ona moomia e le tagata. Peitai sa faamanino mai e le susuga ia Siki, o le mafuaaga ua faasāina ma taofia ai e le Malo ma le Soifua Maloloina lea faiga, ona o le faatupulaia ai lea o le feoai solo o isi i fale o isi e pikiina a latou taumafa.

Ma ono tele ai lava se avanoa e sosolo ma pasi solo atu ai le siama o le Covid-19 i lea tagata ma lea aiga. Ae faaaogā pea lava faleoloa ma supamaketi ua faatagaina mai e le Malo e alu i ai na’o se tagata se toatasi o le aiga e faatau mai ai nei taumafa.

Ua sauni foi le Matagaluega o Leoleo e molia ma lokaina se tasi e vaaia pea o loo faia lenei tulaga o le faatauina o ipu taumafa vela ma soo se taumafa ONLINE!

O le tatou limalima faatasi, e faigofie ma māmā ai se avega.