Ua faalua ona saili avanoa le Apia Maroons ile talita a le iuni lakapi a le Aukilani Samoa i lenei tausaga e lei mafai lava ona manumalo. O le tatalaina o le taamilosaga o le iuni lakapi a le Aukilani Samoa i le vaiaso muamua, na amata lu’i ai e le Apia Maroons le talita sa umia e Laluii, peitai e lei mafai ona sei mai le talita i lea taimi.
Ae na toe faatalitali le Apia Maroons i se isi ona avanoa e toe lui ai le talita, ma o lea sa toe maua ai lona avanoa i le aso Toonai ua mavae ina ua talafeauga lelei le faasologa o ana taaloga i le Mount Fort Brothers ae umia loa e le au lea le talita ma o lea sa toe maua ia loa le latou avanoa e toe lui ai le talita e pei ona iai le taaloga i le aso Toonai ua mavae.
Ae paga lea, e lei mafai ona maluelue ai le malosi o le Seki Works Mount Fort Brothers. Ua tolu ai nei o vaiaso o taofiofi pea e le Seki Works le talita, ma ua faafaigata foi ona toe maluelue.
O ai o le taaloga o Mount Fort Brothers i ai e 58 i le 8 a Apia Maroons, na lagona ai e tagata matamata ua faafaigata ona toe sei e se isi au o le taamilosaga le talita. A maitau foi i taaloga uma a le au lenei e le laititi ‘ai e malo ai ise taaloga e pei foi ona iai le taaloga ma Apia Maroons o se au malosi o le taamilosaga ae 58 ile 8 ai o le taaloga.
O loo saofai pea le Mount Fort Brothers i le pito i luga o au e lei faiaina, e aofia ai ma le United Brothers faapea le au malosi o le Lumua o Tumua, o le vaiaso ua mavae na malolo ai le au a Saleimoa i le la taaloga ma Laulii o le faia’ina muamua lea a Saleimoa.
O le matagofie o le faamaeaina o taaloga i le vaiaso ua mavae ona sa maua ai le avanoa na faatasi atu ai le afioga i le Minisita o fesootaiga ia Hon Afamasaga Tupai Rico e maimoaina lea taamilosaga, ma ia vaavaai ai e toatele alo ma tama fanau o Samoa o loo taaalo i lenei taamilosaga e ono maua ni o latou avanoa i le au a le atunuu faapea foi le Samoa A.
O le aotelega o lagona o le Minisita ona sa faaleo i le taimi o lana saunoaga mulimuli na ia faamalosi ma momoli ai le faafetai i tama taaalo uma o Samoa o loo faaaoga lo latou taleni i lenei taamilosaga.
Na faailoa e le Minisita le auga o aute o lana malaga, ona sa auai mai i le fonotaga sa faia i Niu Sila nei ma le Iuni lakapi a Niu Sila o loo faatalanoaina ai se au a le Pacific Island Team lea e tau faaofi mai totonu o le Super Rugby. Ua mae’a le fonotaga ma ua taoto mai ai ise tulaga lelei lea talanoaga ma le iuni lakapi a Niu Sila ma i latou o loo faafoeina le Super Rugby, ma ua iai le faamoemoe poo le tausaga 2020 ua tatau ona faataunuuina ai loa le fuafuaga ua iai.
Faailoa foi i le saunoaga a le Minisita, le lagona o le iuni lakapi a Samoa o loo iai i le taimi nei, o loo iai le naunautaiga e faipaaga mai ma le iuni lakapi a le Aukilani Samoa ona o alo ma tama fanau o loo iai le taleni lakapi ina ia mafai ona avatu aua le au a le atunuu le Manu Samoa ma le Samoa A. O le fautuaga foi a le afioga i le Minisita mo tupulaga, ia faaaoga lelei le taleni, ma ia onosai, ia au foi nei onana ma fai le taaloga, ia lakapi mo se lumanai manuia, lumanai mo oe, lumanai mo le aiga ma le lumanai mo le atunuu. Momoli foi lona agaga faafetai i le komiti faafoe o le Aukilani Samoa o loo faafoeina lenei taamilosaga aua le fafaguina ma le atinaeina o taleni a le fanau.
O le solosolo lelei foi o le taamilosaga o le Aukilani Samoa i lenei tausaga ona ua mafai ona tuuina atu iai le tau’au o le kamupani a le Digicel ma le G Mana Wholesale Autos e lagolagoina le faamoemoe o tupulaga talavou i totonu o le Aukilani Samoa.
Iuga o taaloga I le Round 5.
Saleimoa 29 Laulii 65
Tama o le Moatoga 45 Iva 37
Nofoalii Salevao 25 Tama o le Lava 12
United Brothers 41 Faleula 10
Nations 38 Aucklands Reds 10
Laumua o Tumua 49 Marist OB 17
Seki Works Mt Fort Brothers 58 Apia Maroons 8 (Talita)
Bye Tama o le Mau.
