Ua folafola e le Pelesetene o le Malo o Saina o Xi Jiping ina ua feiloai ma le Palemia o Samoa susuga Tuilaepa L Sailele Malielegaoi, o le a le solomuli lona Malo i le sasaa mai pea o ana fesoasoani.
E lē tau natia lagona o isi Malo o le lalolagi aemaise lava Malo o loo faifaimea faatasi ma Samoa i o latou atugaluga i le malosi o le pipii o Saina i atunuu tau atia’e o le pasefika e pei o Samoa. Ae ua saunoa pea le taitai o le Malo le afioga i le Palemia, o sootaga mafanafana o Samoa ma Saina ua mausali ma mauaa. E lē o tuua foi e le Malo o Samoa le sulu i a Saina mo se fesoasoani pe a oo ina vaivai lana faasoa tau tupe e faatino ai ni atina’e mo le lelei o le atunuu.
O le feiloaiga i le vaiaso ua mavae a taitai o Malo e lua na faailoa ai e le Pelesetene o Saina o suiga o le tau o se isi lea vaega taua o ana fesoasoani mo Samoa i tausaga oi luma. O le faafetai foi lea a Tuilaepa na folasia i luma o le Pelesetene o Xi Jiping ona o Saina o le isi atunuu malosi lona tamaoaiga o le lalolagi o loo tu malosi e lagolago polokalame e fesootai ma suiga tetele o le tau.
Na faafetaia ai foi e Tuilaepa le agalelei pea o Saina i atina’e eseese o le tamaoaiga o Samoa, ma o le tala moni ua le masino fesoasoani a lea Malo e ui ina faitioina ai pea lo tatou Malo i le siitia o tagata faipisinisi Saina ua faatu a latou pisinisi i Samoa.
E maualuga le agaga fiafia ma le faafetai o le Pelesetene o Saina ona o le mausali ma le malosi o le amanaia e Samoa o le faiga faavae sili ona taua a lea Malo o le tasi o pulega a Saina ma e leai se isi lava Malo e faaluaina ai. O le faiga faavae lea o le One China Policy o loo faasagasaga ai i le Malo o Taiwan o se isi vaega o Saina o loo faia lava a latou pulegamalo ma o loo faauouo e nisi o Malo o le Pasefika ae lē o Saina.
O le malaga a le Palemia i lea atunuu sa saunoa ai ise faatasiga faavaomalo, ma sa malaga ai foi ma nisi o sui o le atinae o tagata tafafao i Samoa. O se avanoa ua silasila ai i latou i auala ma faiga o loo atinae ai tulisi i totonu o Saina.
O se atinae ua tofia ai se tagatanuu o Saina e gafa ma polokalame faalauiloa o Samoa ia faatosina mai ai tulisi i Saina e malaga tafafao mai i Samoa. O se isi lea o fuafuaga o se miti foi o lenei atina’e ia malaga mai ni vaalele tetele o Saina i Samoa e la’u mai ai tulisi mai Asia e tafafao ma faaaogā ai auaunaga eseese i lo tatou atunuu.
