Oleinik ma Mark Hunt - Photo: Getty Images

Oleinik ma Mark Hunt – Photo: Getty Images

Ua ta’u e Aleksei Oleinik le sese o Mark “Super Samoan” Hunt i le UFC136 i Rusia. I le fusu’aga autu o le UFC136 i le Olympic Stadium na feiloai ai le Rusia ma Hunt. Ae e lei uma le taamilosaga muamua ae po e Hunt le maea e taofi le fusuaga. O faiga ia na titina ai e Oleinik le Super Samoan i le taamilosaga muamua o le la fetauiga. O le fusu’aga mulimuli foi lea o le UFC136.

Mai le amataga o le fusu’aga na fa’alagolago ai Hunt i lana fusu, po’o tu’i. O lona malosi’aga lea i le taimi o le ta’aloga. O le tele o tu’i na togi e Hunt e 22% faatusa i le na’o le 12% o tu’i a Oleinik na sao. A’o le taimi lea o fa’atalitali le Rusia e pu’e i le Super Samoan i le maea. O lona malosi’aga lea o le pi’i, o le pogai foi lea o lona igoa fusu o le “Boa Constrictor” o le titina lea o ana pa’aga ina ia to’ilalo.

O le mea tonu lava lea na fai ia Mark Hunt i le taamilosaga muamua. O le pu’e muamua lava na pa’u ai le Super Samoan ma amata ai ona titina e le Rusia.

Na taumafai Hunt e taofia le malosi o vae o le Rusia, ma fa’atalitali le logo e sefe mai ai. Peitai, e matua mamafa le malosi o le o’omi a le Rusia na vave popo ai e Hunt le maea ma taofia ai ma le fusuaga.

O le soso’o ai lea o manumalo e fa a Oleinik, ae o na manumalo uma na maua lea i le titina o ana pa’aga. Ua le sao ai ma Mark Hunt i le malosi o le Rusia. I le talanoaga a Mark Hunt ma le Samoa Times i le vaiaso na te’a nei na ia ta’ua ai le fuafuaga e manumalo ai i le fusu’aga. O le taumafai lea e faaaoga le tomai i fusu’aga e saili ai lona manumalo. E lei popole foi o ia i le faaaogaina o le pi’i malosi a le Rusia pe’a la feiloai.

Peitai o le tulaga lava lea na faaaogaina e le Rusia i le fusuaga ma Mark Hunt. Ua atoa ai le 57 o fusu’aga UFC a Oleiniki i le na’o le 20 a Mark Hunt.  O le soso’o ai lea o faiaina a Hunt. O lana fusu’aga lata mai na feiloai ai ma Curtis Blaydes i le UFC221 na manumalo ai Blaydes i le taamilosaga lona tolu.

O le’a se’e ai foi ma le tulaga o Hunt i totonu o le UFC mai le tulaga lona ono sa iai, i se tulaga i luga lava o le sefulu pito i luga.

O lo’o fa’atalitali Hunt e ritaea mai le ta’aloga. Peitai o lo’o nofo konikarate pea i le UFC. E mae’a lea feagaiga i le fa’aiuga o le 2018.

O lo’o taumafai Hunt e toe fusu tasi lava ona fa’amavae ai lea. O lona mana’o na fa’aalia i le faaiuga  o le fusu’aga ma Oleinik ia maua sona avanoa i le UFC mulimuli o le tausaga i Adelaide e fa’amavae ai ma le ta’aloga.

O le UFC lea o le’a fusu ai ma Tai Tuivasa. Ae o le mana’o o Hunt ia maua sona avanoa e fusu ai i Adelaide e faaiu ma ma faamuta ai foi ma lana feagaiga ma le UFC.