O le vave tali atu o le Ofisa o Faigafaiva i se valaau e faatatau i se tafola pa‘ulia na laveai mai ai si meaola mai i le lolofi atu o tagata e fasi mo le suauu.
O vaaiga nei na popole i ai se tamā i Fatuvalu Safune ina ua logotala ua pa‘ulia se tafola i le nofoaga o loo iai le faasao o le gataifale a le pitonuu lea o Safune.
Faaalia e le sui o le Faigafaiva i Savaii, o le pa‘ulia o tafola i tausaga ua mavae e tele lava ina iu ane ua fasi le i‘a ona o le tele o taimi e pa‘ulia i‘a tetele nei ma mamate ai lava. Ae o le i‘a lea na pa‘ulia i Fatuvalu e laititi ae na ola lava foi i le taimi na maua ai e tagata.
E oo atu le ofisa o faigafaiva ua toso e nisi le i‘a i uta ane o le aau na faapea ona maua ai ae ua fai ai matamataga a le toatele auā o le taimi muamua lea ua vaaia ai se i‘a tele faapea i ia ogasami.
Na vave ona toe toso i tai i le aau le i‘a ae faatalitali le toe sua tutu‘i mai o le tai e unai ai i le tuaau.
E latalata lava i le pa‘u matu o le afioaga le aau ma na ta‘ua e le ofisa lea o le Faigafaiva ai o le malolosi tele o galu o le sami i le amataga o le vaiaso na mafua ai le agai mai o le i‘a ma pa‘ulia ai.
O uluai aso e tolu o le vaiaso na iloga ai le mamafa o timuga ma na faamalosia ai ma lapataiga o galu malolosi mo vaa fagota. Sa taofia mo aso e lua femalagaaiga a vaa la‘u pasese i le va o Savaii ma Upolu ona o le popolega ina nei faaletonu ia femalagaaiga i le sou o le sami. Faato‘ā toe tatala i le taeao o le Aso Lulu ae o vaa fagota na tumau lapataiga seia oo i le faaiuga o le vaiaso. Sa tumutumu matafaga o le afioaga o Fatuvalu Safune ona o le fia matamata o le toatele i lea i‘a.
O le i‘a mulimuli lava na pa‘ulia i Palauli i le tusa ma le lima tausaga talu ai e oo atu le ofisa o faigafaiva ua ‘afa lelei le i‘a ua mae‘a ona vaevae e tagata ma le tala ua mate le tafola tele lea.
O ili afi, o agaese, o to‘i ma paelo faapea uili paelo na la‘u mai ai le aano o le i‘a i uta ona o le faamatalaga e matuā lelei lava le suauu e maua mai i le aano o le i‘a lea pe a susunu.
E ese foi ia vaaiga pe a fuafua i Niu Sila ma isi atunuu i fafo, e alu le tuli a tagata ma pakete ma paelo e la‘u ai le vai e tau faaola ai tafola ae o Samoa e amo le to‘i ma le agaese pe a faalogo i lipoti faapea.
O le galuega tele la lea na faatautaia i le Aso Lulu e sui o le ofisa o Faigafaiva o le tau faamatalaina lea o le tāua o le puipui ma le faasao o nei meaola o le sami ae lē o le tamomoe o le atunuu e fasi pe a iloa ua pa‘ulia ia meaola.
E tusa ma le 15 futu le umi o le i‘a ae na ta‘ua e le ofisa o le faigafaiva o se tafola laititi e lei taitai oo i le tulaga e pei ona vaaia i tafola na pa‘ulia muamua i gataifale o Savaii.
O le uma la o aoaoga na faatautaia ma ua taape i latou e ese fuafuaga sa iai mo lea i‘a, na nonofo ai loa le aumaga o Safune atoa ai le ofisa o le faigafaiva seia sua lelei le tai ona toe faafoi loa lea o lea i’a i le moana.
