Ua ta‘ua lenei mataupu i lenei vaiaso ona ua molia mai ia te au e faapea na fai ni tala a se leoleo i ni alo o Samoa, o loo molia i le tulafono lea e ta‘ua i luga, e aua le popole e o fua i se loia ae na ona omai i le fale faamasino o loo iai Legal Aid (loia e totogi e le malo), ma e lē o se mea telē o le tamai mea e lē telē se afaina.
E faasā i le tulafono i leoleo ona fai ni fautuaga faapea, pe afai e sa‘o le tala lea e ta‘ua. I le taimi nei ou te lē o mautinoa pe sa‘o lea faamatalaga ua oo mai.
Ae tāua ona faaaogā mo tatou lea mataupu auā e telē lona afaina ai o tatou fanau pe a fai ma le lē malamalama.
I lalo o le Section 196 o le Crimes Act: soo se isi lava ua faamaonia ua solitulafono i le faaoolima i se isi tagata, pe fai ni upu ma ni taga e foliga mai o le a faaoolima i le tagata lea e la te feagai, e oo i le tasi le tausaga i le falepuipui le faasalaga.
Section 196 Crimes Act:
Everyone is liable to imprisonment for a term not exceeding one year who assaults any other person
Fautuaga i Mea Faapea e Tulai Mai:
• O le Assault i le tulafono e lē gata i le faaoolima. E aafia i lalo o le tulafono lenei, upu taufaafefe mai, ma ni taga e talitonu ai le tagata lea e feagai ma lē o toatamai, e foliga mai lava e oo i se tulaga faaoolima.
“Assault means the act of intentionally applying or attempting to apply force to the person of another directly or indirectly, or threatening by any act or gesture…causing the other to believe on reasonable grounds that he has, present ability to effect his purpose and to assault”.
• Aua le faaseseina e faapea se‘i vaganā ua faaoolima ona afaina lea i le tulafono lea e ta‘ua i luga.
• Afai e molia oe, e tatau ona e silafia e iai lau aiā tatau i lalo o le tulafono: “Bill of Rights” e te filifili ai e oe sau oe lava loia e faia lau mataupu, ae totogi e oe. E pule oe pe e te alu i ala taugofie o le faaaogā o loia a le malo, pe totogi sau loia e tu mo oe.
• Afai e sa‘o e lava loia e tapena mautu mea e tatau ona tapena e fesoasoani mo oe ma avatu le fautuaga i mea e tatau ona tapena e fai mautu ai le faamasinoga. E tusa pe faamaonia le moliaga, a lelei ona tapena, atonu e telē se avanoa e toe tuu mai e le faamasino, e aua ai ne‘i afaina lou igoa ma lou record i taimi o i luma.
• Afai ae molia oe ma faamaonia le solitulafono, a e falepuipui, e tusa pe na o ni nai masina, e telē le afaina o lou igoa i taimi o i luma. E tāua tele le fautuaga lenei mo fanau fai a‘e. Poo fea lava e te fia malaga i ai, e avatu Form e faatumu a o e lei ulu i le atunuu lea e te malaga i ai, e iai lava le fesili lenei e te taliina:
Do you have any Criminal convictions? Yes/No
Afai e te tali pepelo i le fesili lea, e te falepuipui ai foi pe faasala oe i se salatupe telē ma e falepuipui lava.
E lē o fesili pe laititi pe telē sau faasalaga, ae o le fesili – pe na iai sau faasalaga i le tulafono (conviction). E 10 tausaga o piipii lava lenei faasalaga i lou igoa.
• Afai ua e toatamai i se isi, savali ese ae aua le lu‘iina le tagata lea e te ita i ai, auā e telē lou afaina i le tulafono, e pei ona ta‘ua i luga.
• Afai ua valaau leoleo ma ave oe i le fale o leoleo e fai sau faamatalaga, aua le vave le tautala ae saili se loia e fautuaina oe a o le‘i faia sau tala i leoleo, auā e fai loa sau tala, o le tala lena e tusi i lalo e ave ai oe i le faamasinoga. Afai e lē lelei lau gagana faaperetania, tapa se faamatala upu, e iai lau aiā i le tulafono e te tapaina ai se faamatala upu. Aua e te tautala lē malamalama, ona e alu mulimuli lea i se loia.
• E iai lau aiā tatau e te tapa ai se loia e te manao ai lava oe, ae aua e te faalogo i se tala a se isi, auā o lou ola ma lou lumanai lea e afaina.
• O le tele o aiga ma fanau, a tauvalea le toatasi e afaina uma atu ai lava le aiga ma mātua (reputation). Ia fuafua i luma fuafua i tua, ma manatua le mea e tatau ona fai, ae e te lei faia se laasaga solitulafono.
• Manatua o loia totogi, o a latou galuega e totogi i le taimi e fai ai galuega, ae lē faatali se‘i maua sau tupe. E pei lava galuega faaloia o tou galuega lena tou te faigaluega ai, tou te faigaluega ina ia maua se tupe mo outou aiga i vaiaso taitasi. E faapena galuega faaloia. O le isi foi itu lea e tatau ai ona saili le filemu ae aua le vave le oso o le ita ma soli le tulafono, ae leai se tupe e totogi ai se loia e tu mo oe.
