E lei leva atu ona taofia galuega a leoleo i le tausailia o se alii Saina na alu e tafao i se tasi o mataaga lauiloa i le atunuu le To Sua, ae alia’e ane i luga se isi faalavelave, na aafia ai se tamaitai turisi. O lea tamaitai na faapea na agai foi e taele i le mataaga lava lea e tasi.
E faapea le lipoti na faanatinati iai le ofisa o leoleo ma le vaega laveai a le Ofisa o Fuimu e faasaoina lea tamaitai turisi, ai lava na agai atu lava o loo pe le tai, ae agai atu lava, ma puna i lalo o le vai ma aafia ai ona vae. O le faalavelave foi lenei ua faapopoleina ai le pulega o le mataaga, ona o le aafiaga o ona tala aave i atunuu i fafo.
E lei leva ona taofia le sailiga a leoleo i se alii Saina, e oo mai lava i le taimi lenei e lei maua lona tino maliu. E faapea lipoti o lea foi alii mai Saina na agai na’o ia e tafao i le mataaga. Peitai ua fiu e faatali e lei toe taliu ane lava, ma e atoa le vaiaso o saili e leoleo lea alii Saina. O loo iai le masaloga ua uma lona ola.
E oo mai foi i le taimi lenei e lei maua lava le tino o le alii Seila Samoa mai Niu Sila lea foi na agai i le mataaga lava lea e tasi e tafao ai, ma ua fiu foi e tatali e lei toe taliu ane lava.
O loo talosagaina pea e leoleo tagata o le afioaga ina ia vave logo atu latou pe a iai ni faamatalaga fou o le leiloloa o le alii seila Samoa ma le alii Saina, se’i vagana ai le tamaitai turisi.
Peitai o le faamamafa a le pulega o le mataaga, o loo faatutu solo faasilasilaga e ao ona faitau manino iai ma o latou usitaia tulafono. O laupapa faailoilo o loo manino lelei ai faasilasilaga e ao ona faautagia ma mulimulita’i iai.
I se isi mataupu mai i le ofisa o leoleo lava, ua maua le aiga e ana auivi ma ponaivi ia na maua e ni taulelea o le nuu i luga o se tasi o matafaga e lata ane i Saanapu.
O le lipoti a leoleo e faapea, na logoina atu i latou e le aiga, ma faailoa atu i le ofisa, o latou e ana tagata e ona auivi ma ponaivi. Ua atoa le fā vaiaso o taatitia auivi i le falemai i Motootua, peitai o lea faatoa maua le aiga o nei auivi.
O le auivi tamaitai ma le auivi alii ia na maua faatasi.
